Man United ajanga ni iba jenjang tongtet: Ronaldo

Madrid, November 01 (Agencies): Real Madrid nungi asayar tajungtisang Cristiano Ronaldo-i, pa England football club Manchester United nung adenba mapang football asayaba nung terenlok kanga ngua liasü, ta ashi.
Portugal nunger Ronaldo ya 2003 küm Manchester United nung adenba sülen alima nung football asayar tajungtiba rongnung ka aküm. Pai 2009 küm Manchester United toktsü aser Real Madrid den aden.
Ronaldo-i, Paul Scholes, Gary Neville aser Ryan Giggs nunger lenisüba kübok asayaba ajanga ni tanü iba jenjang tongtet, ta sapoka ashi.
Deobar nü Ronaldo-i, “Manchester United ji ni asoshi kaketrejudak tesem ka amai liasü. Scholes aser Neville nabo training atema anogo shia ghonda ka jeliasa aru. Ni atemabo football asayar mongintem rongnung Neville ya tajungtiba lir. Parnoki yamaji bendanga agüja asayaba ajanga asayar tajungtiba ter jenjang nung amshir,” ta ashiba Times.co.uk ajanga metetdaktsü.
“Giggsy (Gibbs) ajanga ni aika angazükogo. Training mapang ni parnok ama kara ao aser parnok den külemi exercise agia liasü. Parnok dak nungi tatishitsü aika nguogo,” ta pai ashi.
United manager Alex Ferguson aliba mapang Ronaldo club nung denshi aser pai Alex ajungba indang kanga jembir.
“Ni Sir Alex nungi kanga angazükogo. Pai teti na junger, saka ‘telemtetba-agitsü’ majung. Ball kara pass süang, ta ashiba bilemteter,” ta arishi küm 30 tain Ronaldo-i ashidang, ‘Cristiano, ball pass agüjang, ta teti shia liasü, ta paisa shisem.