Hindu nunger anema tasa atonga inyaker: RSS

Ranchi, November 1 (Agencies): Rashtriya Swayamsevak Sangh (RSS)-i lokti nung tesempatep adokdaktsütsü atema mapa inyaker ta aitsüba nung kuli mali ta RSS tongti tezüluri metetdaktsü.
Hindu nunger jenjang raksatsütsü atema tasa atonga mapa inyaker, ta Deobarnü RSS general secretary Suresh (Bhayya) Joshi-i ashi.
RSS pur küm nung anaben agiba Akhil Bharatiya Karyakari Mandal (ABKM) senden nung Joshi ashiba agi, tawa linük nung ozüng alema inyaksangshiba atema Hindu nunger aitsüba ya süoki ia bilemtsüla.
“Tawa tatalokbatem onoki kanga junga bushitepogo aser item ya Hindu nunger maksüdaktsütsü atema jelia nungi tasa atonger inyakbatem ta ngutetogo. Hindu nungertemi kanga aremzüker aser Hindu nunger nisung shingaia tanga tamangba yimsü temulung yirudaktsütsüsa meinyak” ta Joshi-isa ashi.
Küm 90 tema RSS ya yimjak nung tentet ka ama inyaksangshia arur aser onoki lokti nung shilem ajak den amalitepa inyaker. Lokti nung ozüng alema inyakba mapatem junga bushisüngdang mesüi Hindu nunger dak dang tai tongloktsübaji tebilemtsü khuret ka lir.Nisung kari jelia Hindu nunger nüngsentsü atema tasa atonger inyakba ajitettsüla, ta paisa metetdaktsü.