Amit Shah-i NE state unit tem den senden amen

Guwahati, July 14 (Agencies): Tanü anogo tepiyong Guwahati nung BJP Tir Amit Shah-i North East state tem nungi party lenirtem den senden menogo.

North East Zone asoshi BJP, Maha Sampark Abhiyan dak sentakba nung ayongzükba senden nungji NE convenor tem, state unit Tirtem aser lenirtem densema liasü.

Guwahati nung osangbenertem den jembidang BJP national otongdar Nalin Kohli-i, taruba party züngsem asoshi tenüng züluokba sentongji tan ita tatemlen nungi tenzüktsü aser iba mapang nung party nung inyaketertemi missed call mapatong ajanga tamalen BJP primary membership agia alir ajak den tongteptsü, ta ashi.

Parnok nem membership forms agütsütsü aser mapang agütsüteta party tenzüknertem atemabo special training agütsütsü, ta paisa ashi.

“Züngsem züluokba nung onoki tasenpur crore 11 agizükogo. Tashi taliba itshitsü asoshi linük ajungalen onoki temelung agüja tenzüker nisung lakh 15 nem training agütsütsü bilemdagi,” ta Kohli-i ashi.

NE nung party züngsem renlokdagi aser Assam kija nunga 10 ben agi tali renlokogo, ta pai ashi.

“Ochimashi yimsüsüba anema BJP ya teshimtettsü lenmang ka kümdagi aser onoki nüburtem tebilemba ataloktsütsü asoshi noktaktsü,” ta pai shisem.

Ano tanga osang ka nung Assam nung BJP MP temi ashiba agi, Congress densema opposition party aikati BJP nung adentsü aser taruba state assembly election nung tokteptsü mulungogo.

Osangbenertem den jembidang BJP MP Bijoya Chakravarty-i, “Tan ita tatem tashi nung parnok aika ozü party nung adentsüa akok,” ta ashi.