China o France nati tsüngsang mupong azüoktsü tezüngzüktep agir

China yimtiba, Beijing kübok Great Hall of the People kimalen mitkartemi agiba pela agizükba sentong nung France Tir, Francois Hollande (Achijilen) aser China Tir, Xi Jinping nati shilem agiba noksa nung angur. (Beijing, November 02)

 Beijing, November 02 (Agencies): China Tir, Xi Jinping aser par linük semdangsang, France Tir, Francois Hollande nati alima tsüngsang mupong azüoktsü den sentakba tongti tezüngzüktep ka tanü Hombar nü agiogo.

Alima tali tatsükba akümba ajanga tsüngsang mupong balaka küma melenshibaren azüoktsü nükjidong nung alima linüktemi miim aketba carbon tango tajemba adoktsütsü asoshi nangzükaren küm 5 shia timba agidaktsütsü onük benoktsü asoshi lenir anati tanü nangzüktepogo.

Tanü lenir anati par linük ana tsüngda amaliteptsü aser shishilembatsü tezüngzükteptema agiba osang jangjaogo.

United Nations (UN)-i ayonger külen tan November ita 30 nü nungi tenzüka taruba December ita 11 nü tashi Paris yimti nung tsüngsang mupong azüoktsü tongti senden ka amentsü ayonga lir.

Aji oda, Hollande aser Xi nati iba senden nung onükji benoka kasaji mapa küma inyakdaktsütsü asoshi tan alizüng ayur lir.

Ano, alima tsüngsang mupong melenshibaren azüoktsü nükjidong nung par linük ana ya carbon tango kanga dang ajema adokdaktsüba linük 2050 küm tashi nung kümdaktsütsü asoshi tenati tanü pangjemogo.

Xi aser US Tir, Barack Obama densema, alima linük 80 shi nungi lenirtemi Paris nung ayongba Climate senden nung shilem agitsü asoshi renemba osang angazükogo.

Alima ajungai külemi lungjemer alima Celsius degree 2 dak tema tatsükba mekümdaktsüba ajanga alima tsüngsang mupong balaka küma melenshibaren azüoktsü nükjidong nung UN-i Paris sendenji ayongba osanga jangjaogo.

Alima linük ajak rong nung China ya miim carbon tango timba adoktsüba linük lir aser par linükia carbon tango tajemba adoktsütsü asoshi nungdakba maparen inyaktsü asoshi taküm June ita nangzüka lir.

“Tan China lenisang, Xi den agiba tezüngzüktep ya alima tsüngsang mupong melenshibaren azüoktsü shilem nung tongti mera ka agir lir,” ta Hollande-i tesülen metetdaktsü.

Ano, alima ajunga nung carbon tango timba adoktsüba linük rong nung tanabuba jenjang abenba US linükia 2025 küm tashi nung carbon tango noklang nung shilem 28 agi tajemba kümdaktsütsü asoshi nangzüka lir.

Tasembuba jenjang abener European Union (EU)-ia 2030 tashi nung miim aketba greenhouse tangotem noklang nung shilem 40 agi tajemba kümdaktsütsü tenangzükba metetdakja lir.