Congress-i NDA sayutsüngi masütsüla: PM Modi

Purniya, November 02 (Agencies): Congress Party-i tang linük nung akhümtsübutep aser maremzüktep tensa aliba onük nung sorkar aitsüba dak sentakba nung tanü Ato kilonser, Narendra Modi-i 1984 küm Sikh nunger anema rara tulu adokba tetshia, Congress-i NDA sorkar nem sayutsüngi magütsüi aakseta tekolak angüma alutsüla, ta aitsüogo.

“Tanü anogo ya November 2 nü lir. Nenokia 1984 küm bilemteter asü (?) Indira Gandhi tepsetba anogo sülen tanünü, tasemnü aser pezünü tashi Delhi aser India ajaklen Sikh nunger lakh aika tepset, aser iba atemaji Congress aser par lenirtem nem tai tonglokja lir. Tanü, iba kasa anogo nung Congress party-i linük nung mepetmesü aliba onük nung sayutsüngi agütsür,” ta Ato kilonser Modi-i ashi.

November 5 nü Bihar election agitsü aliba Purnea, Seemanchal tesem nung nüboyim sentong ka nung jembidang Modi-i, “Takoksa ajurur Sikh nunger tenük nung ano nüktzü makong. Parnok zübo ano manep aser iba anogo, November 2 nü nenoki (Cong) iba tamasa ayir,” ta ashi.

Linük nung mepetmesü aliba aser tamangba lokti tulubai lokti tila anema inyakba onük nung Congress bangtak lenirtemi Tir, Pranab Mukherjee ajurua jembitsü telemtetba agiba anogo ka nung Ato kilonseri item o ya jembiogo.

Bihar Chief Minister Nitish Kumar aser RJD chief Lalu Prasad nati Congress nem menden 40 agütsüba atema anemsü agi Modi-i tena dang pelar, ta ashi.

Item mendenji mela mela BJP dangi arutsü, ta Modi-i ashi.

“Lalu aser Nitish napronglai mapang talangka Congress anema aruogo. Bihar nung maliba party, Congress nem tenati menden 40 agütsüba ya, aji oda inyaktsüsa langka kar aliba ajanga südi. Tayongzükba makai onok nem menden 40 agütsüba atema ni tenaprong dang pelar. Congress nem menden 40 agütsüba atema Lalu aser Nitish na dang pelar. Ni Bihar nüburtem danga pelar,” ta Modi-i ashi.