Aor mapang mesüi !

Küm 12 jakdang Nagaland nung Wb.S.C.Jamiri aniba Congress telok madak NPF teloki takok anguba sülen tangar Naga nunger kin kari Aotsür Aortem dang ‘Joko Nagaland nung Aor mapang süiogo, ibai nenok mapang masü, anungji mapa bushii taru aser tasüngdanga tasüngdang,” ta ashiba otsü aiben angashia aruogo. Atangji, iba o ji azü madoki temulung yirutsüba aser mezüngmeshiba o lir.  Iba o jembirtem jagi Aor dak kanga jashia aliba aser tenükmerema aliba kuli tejangja ka sayur. Iba o angashidangji, shitakba Nagaland nung Aortemi Naga nungertem nem magütsüi temoatsü molamoshia agiba mapangji kodang liasü (?) ta jepaka nüktzü malu temulung ayanga bilemer. Nagaland state makümdangyongi Tsüngrem taochi agi Naga nungertem dang nungi tashitemetet anguba, awashi metetba aser Tsüngrem temeim angatetba nung Aortem jenjang tajungba aser temaba nung liasü. Anungji, iba tashi aser maongkaji bener Aotsür Aoertemi tetsüng agi tekolak nung khu bener memetetba Naga kintem aika tonga oagi alima tashimetet aser Tsüngrem temeim  osang tajung indang angatetdakja sayuogo. Tanü Naga nungertemi Aor mapang indang jembibaji iba mapangji asü (?) ta asüngdangnütsüka bilemer. Ano, Nagaland state makümdang,  Naga  nunger yimten nüjiso asoshi India den raraba mapang, Ao lima nungbo India sepaitemi Aoer yimtsüng aika aut küma rongdoktsü, alu raksatsü aser yimtsüng asem pezü yim ka nung pudena reshikangshi. Tetsürtem dak tashiyim agi maksü benshi aser teburtem aika teti taküm lemtatsüsa züka merenshia reshikangshi. Ibaji tanü Naga nungertemi jembiba Aor mapangji asüh asü ta kanga temulung shia bilemer. Nagaland state kümer külena state bener arurtem  rongnung tekolakba Aorsangbo khaseta endok aser ano külen yim aika nung Village Guard yoka reshikangshidaktsü, iba mapangji tanü Naga nungertemi jembiba Aor mapangji asü ta temulung ayanga bilemer. Nagaland kümer külena tangar mounülen kinük kisang ajaklen Aotsür Aoertemi oa Naga nunger tenzük. Nagaland sorkar nüngdak nendaka inyakertemji tsümartem denbo Aortem dang liasü. Item jagi anogo nung office mapa ghonda 12 dak tali inyak. Item jagi ochishia Naga nunger tenzük. Ibaji Aor mapangji liasü asü (?)ta ano külenbo temulung chia bilemer. Ajisüaka, Naga nungertem kari danga Congress teloki yimsü asüba mapangji Aor mapang liasü ta bilemra, tai asütsü. Atangji, Congress mapang nung Aor chief minister ser Aor kilonser aika liasü. Ajisüaka, parnoki tangar kin indang rakzüka Aor nem magütsü. Congress mapanga Congress nung madenba Aor aika liasü aser tanga NPF nung adener Aor aika lir. Aji oda, Congress-ji Aor government aser NPF bo Aor government masü ta Naga nunger kari danga bilemra, ibaji tenük küleni dang repranger asütsü. Ajisüaka, Naga nunger kari danga tang ya joko Aor mapang süiogo ta bilema lira, ibaji parnok tebilemtsü masü Aor tebilemtsü asütsüla. Iba jagi Aotsür Aor nem tasüngdangba tuluka agütsür. Aji oda, shitakba Nagaland nung Aor temoatsü aser maongka agitsü mapang süir no (?) ta tang mapangba ya Aotsür Aortem ajaki peisasa bilema telangzüba bushitsüba mapang lir. Iba tasüngdangba jagi asenok tashimait aser asenok teinyaktsü wadanga tuluka sayurtsü Atangji, asenoki maparen aika nung Naga nungertemi asenok dak temulung machitsüsa inyaker alitsü. Aji oda, asenoki anir yimten inyakyim shitak inyaka aotsüba ser nung asenokiang anir raksaba tesem aika alitsü. Itemji metongshitsüba mapangji tang ya asütsü. Nagaland kümer küm 52 süiogo saka ano shitakba Nagaland-bo meyanglu, anungji ano Aor mapang mesüi, kechiyong Nagaland nung Aor mapangjibo Naga nunger ajak ajungtsü khuretsa bilema inyakba mapang asütsü. Tanü Nagaland nung ozüng mamshitettsüsa kanga mejungi raksaa lir. Nagaland nung auyi aser lishi agi tesenzü majung, kaketshisatsü tajung mangur aser lanurtem nem mapa magütsütetter. Ajisüaka, teimla kaji Nagaland nung Aor mapang mesüi, kodang Aor mapang arudir, item timtem aser tebilemtsü ajakji kokadoktsü. Iba mapangji atema, talisa, Aor lanurtemi teka ia inyaktsüsa tekolok shisatsü  renemtsüla.