Farrukhnagar nung ninang telok kati sepaitem amak

Gurgaon, November 03 (Agencies): Mongolbar anepdang Farrukhnagar police station nung ninang telok kati amakdang police asem aser nisung trok yirutsüogo.

Tanep 7:00 ako meta police station anasa süngo ayokba stall ka nung police temji süngo jemtepba mapang ajungbena ninang telok ka arua police aser anasa aliba nisungtem dak metak.

Osang ajanga ashiba agi, police karbo takdang ka nung jenoka sü agi longbang.

Ninang agi yirutsürtemji PCR van ka nung anasatiba hospital kati anir ao. Parnok rongnung police ketdangser (ASI wireless operator) Mahesh, police cook, Kailash aser süngo ayokba stall kibur Ishwar nunger dak ninang timbai metak. Stall kibursangjibo kanga mejungi lir aser pabo Gurgaon nung aliba Civil Hospital-i anir aotsü tuyua liasü.

“Ninangji azüoktsü atema ghonda ka shi agi. Iba tensa maongka agia police station nung pua alir kabo jenogo,” ta osang ka ajanga ashi.

October 29 nüa Andhra-Odisha Border (AOB), Balapam nung Maoists telungpurtem mita aoba mapang ninang telok kati Central Reserve Police Force (CRPF) aser District Armed Reserve Force sepaitem amakdang tajemba agi sepai 18 tashi yirua liasü.

Iba tesem nung tesüiba ita pezü tsüngda ninang teloki sepaitem amakba pezüben atalokogo.

October 27 nüa Odisha, Chintapalli nung ninang telok kati sepai 25 shi yirutsü. Ninang jagi sepaitemji metre 400 dak tema arishia liasü.