Mumbai police kar Dawood Ibrahim den tesentaktep lir: Rajan

New Delhi/Bali, November 03 (Agencies): Tawa Indonesia, Bali nung police-i apusang India nunger telungpur tetsüdi, Chhota Rajan-i, Mumbai police kar Dawood Ibrahim den tesentaktep lir aser pa dang asüngdangyaba mapang Centre-i ibaji temelung nung yur asüngdangyatsüla, ta ashi.

Paisa, taoba mapang Mumbai police-i pa reshikangshiogo, ta ashi.

Tanü Bali nung osangbenertem den jembidang Rajan-i, “Mumbai Police-i ni aiben reshikangshiogo. Parnoki kü dak kanga mejungi benshi,” ta ashi.

Pa India nung Delhi asü Mumbai-i anir odaktsüner ta asüngdangba langzüdang pai, “Iba telemtetbaji sorkari agitsü, ajisüaka kü nem ochi obendang agütsütsü atema parnoki inyaktsüla,” ta ashi.

Mumbai nung asor Rajan anema nisung tepsetba, mozü shibelenba aser rakzükraktemba ken o 75 dak tema benoka lir. Indonesia police-i oshi meyiptsür ka ajanga English aser Hindi naprongla nung pa dang asüngdangyaogo.

Mapang ka nungbo pa telungpur tetsüdi Dawood Ibrahim den kanga atongsema liasü ajisüaka tesülen pa den tsükchir akum.

2000 küm Bangkok nung Dawood’er nisungtemi Rajan taküm agitsü merang ajisüaka pa iba lendong nungi jenbua liasü.

Taoba ita October 25 nü Rajan Australia nungi tayimtsü ajanga aruba sülen Indonesia nung apu, aser kobi melii pa okadak noktaktsü.

Hombar nü Indian police team katia Rajan dang asüngdangyaa liasü, aser kasa teloki team-i Rajan India-i tekaraba nung anir arutsü asoshi inyaktepdar.

Rajan chichiba tenüngbo Rajendra Sadashiv Nikhalje lir, aser tesüiba anogo ishika tsüngda Indonesia police-i pa dang aiben asüngdangyaogo.