BJP Nagaland State Unit-i Nitin Gadkari dang nem tezüluba ka agütsü

Dimapur, November 4 (TYO) : BJP Nagaland State tir Dr M.Chuba Ao aser State Executive member HK Khulu na lenisüba nung teshimtet telok kati November 3, 2015 nü Union Minister of Road Transport and Highways and Shipping, Nitin Gadkari nem tezüluba ka agütsüogo, ta General Secretary & Spokesman K. James Vizo-i sangdong nung metetdaktsü.
Patkai Bridge, Chumukedima nung Dimapur nungi Kohima 4 lane lenmang yanglutsü atema lung azünga ayuba mapang BJP Nagaland State Unit-i Gadkari nem Nagaland nung infra-structure renloktsü atema tezüluba nung agütsü, ta sangdong nungsa shia lir.
Party züngsemtem den sensaksemdang Union Minister-i ashiba agi, nübortemi BJP indang meshii angatetba shisatsü agientsüla kechiyong BJP-i teküpoktiba tia nung alirtem asoshi terenlok aser tajangzük bener arutsütsü atema inyaker.
2012 küm BJP National President alidang Nitin Gadkari-i Nagaland semdangi aru aser Tuensang o Mon district tem semdang. Iba mapang pai rongsenkettsüng jenjang majungba agi iba tesem nung terenlok mali aser party-i mapang shitak nung iba khuret atema inyaktsü ta shia liasü, ta BJP Nagaland sangdong nungsa metetdaktsü.
Nitin Gadkari-i Nagaland nung gari lenmang aser aputem yanglutsü atema sen crore 1000 agütsütsü sangdongba atema pa dang kanga pelar, ta BJP State Unit-isa metetdaktsü .
Dimapur nungi Kohima 4 lane lenmang yanglutsüba ya mezüng NDA sorkar nung taoba prime minister Atal Behari Vajpayee-i nangzük. BJP-i Nagaland nung terenlok bener arutsü atema tenangzükba agia lir aser nisung ajak ajangzüktsü atema nübortemi tebilembatem lemsatepba pelashishia agizüktsü, ta Nagaland BJP-isa sangdong nung shia lir.