Dimapur police-i nisung külakoktsür 7 apu

Dimapur, November 4 (TYO) : November 1, 2015 nü Galaxy Hotel, Dimapur nung Dimapur Police-i Jet Airways tenüng nung interview agir nisung pezü apu.
Osang angazükba sülen police-i par pezü anenzükba taktang mita aodang Jet Airways indang appointment letters, seal nungertem angu, ta Addl. Dy. Commissioner of Police/PRO Dimapur-i sangdong ka nung metetdaktsü.
Iba dak sendakba nung asüngdangya asüdang par pezü ya ashikülakertem aser tiyazü nung Jet Airways ketdangsertem ama inyakba putet. Parnoki candidate 15 nem appointment letters agütsür liasü aser parnoki candidate tem dang nungi registration fees agi aser iba sülen shimtetba candidate dang nungi mapa apir taa balala meshi, ta Dimapur police-isa ashi.
Par pezü ya Saurav Mehra, Chamanla, Manoj Sachdeva aser Deepak Suri nunger lir aser parnok ajak Punjab nungi lir. Parnoki külakoktsürtemi East Police Station nung arua osang agiteptsü mepishir, ta sangdong nungsa metetdaktsü.
Nübortemi print aser social media nung mapa atema advertisements agütsüba nung kanga kümdanga tamasa osang tejangja metettsü merangtsüla aser temulung melemi bilemba inyakyim tekaratiba nung police nem sangoktsütsü mepishir, Dimapur Police-isa sangdong nung shia lir.
Ano, November 2, 2015 nü Dimapur Police-isa hon shishilembar ta shia tangar ashioktsür nisung asem apu.
Police-i apurtemji Ahadul Isla, Md Raul Amin aser Hussain Ali nungertem lir aser parnok ajak ya Nagaon, Assam nungi lir. Parnok ket nungi hon mesükba yin gram 750 shi ngutet aser East Police Station nung ken o ka benoker maneni bushisüngdang südar, ta Dimapur police sangdong nungsa metetdaktsü.