Ni Myanmar Tir den temaba menden abentsü: Suu Kyi

Myanmar opposition lenila, Aung San Suu Kyi-i Yangon yimti nung ayongba election nüboyimtsü sentong nung osangbener den ajurutepba noksa ka yangi angur. (Yangon, November 05)

 Yangon, November 05 (Agencies): Myanmar opposition lenila, Aung San Suu Kyi-i Myanmar Tir menden den temaba menden abentsü renemba olen ka tanü Brehostibar nü metetdaktsüogo.

Tan hopta tatemlen agitsü renemba election nung lai aniba National League for Democracy (NLD) yimtenren teloki takok ngua Myanmar sorkar tasenba tentetsü temeten ngura, linük temzüngi la nem Tir menden abentsü temeten magüjaka, lai Tir menden den temaba menden abentsü ta Suu Kyi-i metetdaktsü.

“Ozü NLD teloki tan election nung takok ngura, ni Tir menden den temaba menden abentsü jenjang angutsü,” ta Suu Kyi-i tanü osangbener dang metetdaktsü saka iba osang den sentakba osang tangbo lai memetetdaktsü.

Bendanger ka den kibong akümer mesüra pei chirnuri bendang senso agia alir ka nem Tir menden abentsü temeten magütsütsü asoshi Myanmar linük temzüng nung lateta lir.

Aji oda, Britain nunger den kibong akümba den külemi, jabaso ana tashi Britain senso agia aliba yong Suu Kyi-i Myanmar Tir menden abentsü temeten mongutettsüsa tang jenjang ajurua lir.

Ano, tan Deobar nü agitsü ayongba election sentong nung ozüng alema aser ochimashi maparen inyakba osangtem election ketdangsertemi mazüoktsü akok ta lai tebilemtsü khuret ka lemsatepa liasü.

Tan election agitsü asoshi terenemshiba agia, election ketdangsertemi par linük ajunga indang voter tenüng tarsen tatem küma renemtsü tenzüka lir.

Iba voter tenüng taresenji tan November ita 2 nü tashi nungbo tatem küma adoktsütsü asoshi Union Election Commission (UEC)-i mezüngbo metetdaktsü saka technical timtem kar ajuruba ajanga kasaji sangdongba ama madoktsütetba olen ka Yangon Region Election Commission lenisang, Ko Ko-ia tanü metetdaktsüogo.

Nüburtemi aginüba ama, Myanmar ajunga nung election sentong ochishia agidaktsütsü tenangzükba olen ka Myanmar Tir, Thein Sein-ia tan Mongolbar nü metetdaktsüogo.

“Ozü Myanmar linük ajunga nung nübur ajungai tetsükdakba kecha majurui election sentong nung shilem agidaktsütsü nangzüker,” ta pai ashi.

Ano, par linük tentetba yimtenren telok ajungai election agiba sülen takok anguba osang agizüktsü aser sorkar tasenba tentettsüren nung külemi lungjemer amalitepa shilem agitsü tajungshiba olen ka Sein-i metetdakja liasü.

Mitkartemi mapang talangka yimsüsütsü tashi abenba sülen, Myanmar-i tan mezüngsüa democracy yimsüsü inyakyim benshia nüburtemi shimtetba yimsüsürtem nem sorkar tentetdaktsütsü maparen tenzüker lir.