Dr Sakena Yacoobi-i 2015 Education WISE Prize agizükogo

Qatar chubatsür, Sheikha Mozah (Abelen) aser US Tir, Barack Obama kinüngtsü, Michelle Obama (Achijilen) nati Afghan Institute of Learning (AIL) tentetla aser CEO, Dr Sakena Yacoobi nem gold medal aser senpet sen dollar sen 500,000 densemba sempet agütsüba noksa nung angur. (Doha, November 05)

Doha, November 05 (Agencies): Afghanistan nung Afghan Institute of Learning (AIL) tentetla aser Executive Director menden abenla, Dr Saken Yacoobi nem Education shilem indang 2015 World Innovation Summit for Education (WISE) sempet tanü Brehostibar nü Qatar kübok Doha nung agütsüogo.

Afhanistan nung kaketluyimtsüren tetsü ta züngokla, arishi küm 65 tain Dr Yacoobi-i lar Afghanistan nung kaketshisatsü bushitsüren jenjang tajungba kümdaktsütsü asoshi küm 20 shi bendanga agüja inyakba osang bushiteta lir.

Doha nung agiba 7 buba WISE senden indang Opening Plenary session nung Qatar Foundation (QF) nung mendenbula, Qatar chubatsür Sheikha Moza bint Nasser-i Dr Yacoobi nem tanü sempetji agüja liasü.

QF teloki international sabang nung ayongba 7 buba WISE senden nung linük 150 densema, alima tesem balala nungi WISE züngsem 2000 shi shilem tagidak lir.

2011 mezüngsüa agütsüba Education shilem indang WISE sempet ya kaketluyimtsüren nung tongti shilem agir kija mesüra telok nem kümshi agüja arur.

“WISE sempet agizükertem ya WISE nükla aser nükjidong atalokdaktsürtem lir. Parnoki parnok aliba tesem nung kaketluyimtsüren temaba jenjang nung ajungkettsütsü asoshi pei taküm bendanga agüja inyaker. Taküm, 2015 WISE sempet agizükla, Dr Yacoobi-ia tongpang kanga sashia rara tensa mejungi liaka, ibaji tetsükdakba lung ka mekümdaktsüi lar Afghanistan nung kaketluyimtsüren jenjang tajungba kümdaktsütsü asoshi la taküm bendanga agüja inyaker ka lir,” ta Nasser-i tanü sentong nung metetdaktsü.

Dr Yacoobi-i la taküm samatsütsü metsüboi refugee jenokdak balala nungi tenzüka miima tentetba aonung kaketrejutem nung kaketshisatsü agütsüba den külemi, nüburtem nem taküm junga alitsü tesayubatem agütsütsü tenteta aika tentetogo aser ibaji ajanga teburtem densema, tetsür million aikati tejangzük tulu nguogo ta lai shisem.

1990s tetenzüklen nungi tenzüka, Dr Yacoobi-i Pakistan nung tentetba refugee jenokdak balala nung kaketshisatsü agütsüba den külemi, tesayurtem sayuteta tetsür aser tetsür chanutem asoshi kaketreju balala tentetba osang bushiteta lir.

Taliban telungpurtemi tetsürtem nem kaketshisatsü magütsütsü ozüng agüjaka, Dr Yacoobi-i tali tasü itshir nüburtem talisa, tetsür chanutem nem tesayuba balala agüja aruogo.

Ano, kidangsüa aliba Pakistan aser lar Afghanistan na nung tesayurtem jenjang tajungba kümdaktsütsü nükjidong nung lai AIL 1995 küm tentet.

AIL tenteter tanü tashi nung Afghanistan tezülen, yimtsüngtem nung alir tajemba agi nisung million 12 shi tajangzük tulu nguogo.

“2015 Education shilem indang WISE sempet agütsütsü asoshi kü tenüng shimba atema kanga dang pelar. Iba sempet agizükba ajanga nüburtem maneni ajungmesotsü imlar,” ta Dr Yacoobi-ia tanü metetdaktsüogo.