Kobi melii Chhota Rajan India tonga anir arutsü: Rajnath

New Delhi, November 05 (Agencies): Tawa Indonesia nung police-i India nunger telungpur tetsüdi, Chhota Rajan pua liasü, aser pa India-i anir arutsü lia ‘volcanic ashes’ ajanga Indonesian tayimtsü mesenzütettsüsa akumba yong anogo atsülanger lia tanü Union home minister, Rajnath Singh-i, kobi melii iba linük nungjagi telungpur tetsüdi Chhota Rajan anir arutsü, ta shiogo.

“Chhota Rajan kobi melii anir arutsü,” ta tanü sentong ka aliba mapang Rajnath Singh-i osangbenertem dang ashi.

November 25 nü Indonesia, Bali police-i Rajan pua liasü, aser pa India-i anir aotsü atema Indonesia sorkaria melungogo.

Ajisüaka Bali anasa aliba asetkong ka nung ‘volcano’ apokba ajanga Rajan anir arutsü maparen nung tetsükdaktsü adok. Mount Rinjani nungi volcano indang mokozü tulu arua tayimtsü lenmang nung timtem agütsüba ajanga Mongolbar nü local ketdangsertemi Bali nung aliba Ngurah Rai International Airport shibangja liasü.

Maneni Rajan Denpasar nung yua lir.

Indian agency temi pa tekaraba nung India-i anir arutsü meranga liasü aser Indonesia ketdangsertem dang Deobar nü anir arutsü asüngdanga liasü.

Rajan shitakba tenüngbo Rajendra Sadashiv Nikalje lir, aser India nung pai nisung tepsetba, temesepba mozü shibelenba aser rakzükraktemba ken o densema pa anema ken o 75 dak tema benoka lir.

2000 küm India-i bushia aliba kiralongrar tongti, Dawood Ibrahim’er nisungtemi pa Bangkok nung aliba hotel ka nung tepsettsü merang, saka pa iba lendong nungjagi jenbua liasü.