Vyapam ochimashi ken o nung CBI-i FIR ana benokogo

Bhopal, July 15 (Agencies): Madhya Pradesh nung Vyapam ochimashi ken o bushisüngdangba mapang tanü CBI-i FIR ana benokogo, ken o ana nungji nisung aika rongnung Madhya Pradesh Backward Classes & Minorities Commission züngsem ka aser par jabaso na densema lir.

FIR anaji 2010 küm Pre-Medical Test aser 2011 küm pre-PG Examination dak sentaka lir.

Hombar nü CBI-i Madhya Pradesh police, Special Task Force ket nungi Vyapam ochimashi bushisüngdang ken o agizüka iba bushisüngdang tenzüka liasü.

Supreme Court-i iba ken o aser iba dak sentakba nung nisung asüba ken otem bushisüngdangtsü atema CBI dang tuyua liasü.

Congress-i ashiba agi iba ken o dak sentakba nung tang tashi nung nisung 49 tashi süogo.

Pre-Medical Test 2010 indang FIR nungji IPC section balala kübok CBI-i candidate 21 anema ken o benokogo, ta osang ka ajanga ashi.

Ano 2011 küm Pre-PG examination dak sentakba nung melung malemba nisung 8 anema section balala kübok CBI-i FIR ka benokogo.

FIR nung agüja aliba tenüngtem rongnung Madhya Pradesh Backward Classes & Minorities Commission züngsem Gulab Singh Kirar aser par jabaso Shakti Singh Kirar na densema lir.

Iba dak alia taoba mapang Vyapam Controllers of Examination, Sudhir Bhadauria aser Pankaj Trivedi nata densema lir.

SC-i tuyuba nung ajemdaker Joint Director R P Agarwal lenisüba nung züngsem 40-i akümba CBI team ka tentetogo.

Madhya Pradesh nung Vyapam ochimashi ken o nung tongtibang yimtenren lenirtem aser sorkar ketdangsertem aika densema lir.