Motor Rally nung shilem agirtemi Mangkolemba ajangogo

Dimapur, November 05 (TYO): Mokokchung jila küm 125 tain akümba nüngtem nung ayongba Tour de Hills 3 tetoktepba sentong nung shilem agir gari 30-i Mongkolemba tanü Brehostibar nikongtsütsü 3:30 ako meta tonga aluba osang jangjaogo.
Adventure & Motor Sport Association, Mokokchung (AMAM) teloki ayongba sentong ya Mokokchung nung yashi, Bodbar anepdang 7:00 ako tenzüka liasü.
Mangkolemba nung ADC, SDO (Civil), doctor, nurse, sorkar ketdangser, lokti lenir, nübur aser Mangkolemba Students Union kaketshirtemi sentong nung shilem agirtem pela agizük.
“Tan sentong nung shilem agirtemi tesem balala semdangba ajanga taoba mapang Ao kini kanga meranga inyakba bilemtetdaktsür. Ano, tarutsü mapang nunga nüburtemi bendanga agüja inyakba ajanga Ao kin jenjang tajungba kümdaktsütsü ajungshir,” ta Mangkolemba nung SDO (Civil), Renbomo Ezung-ia tanü metetdaktsü.
Tan sentong nung shilem agirtemi tanü nikongtütsü 4:00 ako meta Mongkolemba toktsür Chungtiayimsen bushia tuogo.
Parnoki idakji taonung yipzüker külen asüng, Hokolbar anepdang 7:00 ako nungi tenzüka tanaben Mokokchung jila bushia aotsü sentong lir.