Acharya-i RSS ama inyaker: Assam CM Gogoi

Guwahati (Assam), Nov. 05 (Agencies): Tanü Assam Chief Minister, Tarun Gogoi-i, state Angh, P B Acharya-i state nung tekolak ka ama masü saka RSS züngsem ka ama inyaker, ta sashia aitsüogo.
“Angh-i state nung yimtenren shilem agir. Pai politics asayar aser RSS züngsemi inyakba ama inyaker,” ta Gogoi-i ashi.
Chief Minister-isa, sangküm state nung Assembly election agitsü alibayong Centre nung BJP sorkari Acharya yok, ta ashi.
“Pa (Acharya) Nagaland Angh atema shim aser Assam Angh-a repsema abentsü lemzüktsü, ajisüaka pa ya state nung Assembly election aliba ajanga anir aru ama reprangteter,” ta Gogoi-i osangbenertem dang ashi.
Pa dang masüngdangba sayutsüngi o pai agüja arur aser Chancellor ama pa tashi amshia RSS shisashirtem tongtibang menden atema shimmer, ta Assam Chief Minister-isa aitsü.
“Ni yimtenren nung mapang talangka aliba mapang ni iba ama Angh mengudang,” ta paisa ashi.
Tesüiba ita ishika sentong aika nung state Angh-i Chief Minister aija, pai state nung ochimashi aser kentok tepsetba mazüokteter aser yimtsüngtem nung lenmang meyanglutsüteter, ta jembia aruogo.
Angh-isa, CM Gogoi-i Centre sorkar indang terenlok scheme balala state nung benoka meinyakteter ta aitsüogo.
State nung tesayurtem aser aluyimertem soseta asüba atemaa Angh-i Gogoi-i aniba sorkar aitsüogo.