Vietnam-i China den tesendaktep tajung ayutsü nangzüker

Hanoi, November 06 (Agencies): Vietnam-i China linük den tesendaktep tajung ayutsü tenangzükba olen ka tang par linük semdangsang, China Tir, Xi Jinping dang tanü Hokolbar nü metetdaktsüogo.
Par linüki China den iba tenangzükbaren agiba den külemi, Beijing den ken o adokba linük, Japan den teloktep mitkar terenemshitsü sentong agitsü ayongogo.
Yaküm, 2014 küm nungi tenzüka Vietnam den South China Sea den sentakba mangatettep ken o adokba par linük ana tsüngda tesendaktep mejungi akümtsü tenzükbaren agientsü nükjidong nung Tir Xi-i tan Vietnam semdanga par lenirtem den senden balala amenba osang jangjaogo.
Par linük anapronglai kati ka dak temulung alemtsü aser tzüyim den sentakba ken o angatetteptsü nangzüktepa liasü.
Ajisüaka, Xi-i Vietnam toktsüba sülen Vietnam tzüyimkümlen tentetba tongti mitkar tesem, Cam Ranh Bay nung Japan mitkari ketdang asüba warship rong ka ayutsü aser Japan o Vietnam nati mitkar teloktep terenemshiba sentong agitsü asoshi jaokba osang ka Japan’er defence ministry-i tanü metetdaktsü.
Japan mitkartemi tesüiba mapang, World War II (WWII) nung tashiyim inyakba aser East China Sea den sentakba mangatettep ken o adoka, Japan aser China na tsüngda tesendaktep tang mejungi aliba osang bushiteta lir.
Ano külen, Vietnam-i kasa anogo nung China den tesendaktep junga ayutsü nangzüktepba den külemi, Japan dena teloktep mitkar terenemshiba sentong agitsü asoshi Japan ayongba ajanga China jashidaktsütsü ana nung lir.
Ajisüaka, pei linük kümzüka alitsü, shishilembatsü aser yimtenren shilemtem nung West aser Asia na nung tongti linüktem den tesendaktep tajung ayutsü nükjidong nung Vietnam-i tan iba tasa ya amshiba osang jangjaogo.