Linük tensa onük nung PM Modi-i jembitsüla: NCSC Mendenbuba

Agartala, November 06 (Agencies): Hokolbar nü Agartala nung National Commission for the Scheduled Castes (NCSC) Mendenbuba, P.L. Punia-i, NDA sorkar tashii aruba sülen India nung tamangba lokti tsüngda akhümtsübutep maliba den mepetmesü tensa tamajungba kümogo, aser iba dak sentakba nung Ato kilonser Narendra Modi-i jembitsüla, ta ashi.
“Centre nung BJP-i aniba NDA sorkar tashii aruba sülen mepetmesü tensa ulua kümogo. Iba tebilemtsü onük nung Ato kilonseri ola madoki alir,” ta Punia-i tanü osangbenertem dang ashi.
“Linük tesem balala aika nung, lokti tilaba nübur anema inyakba aser rara tatalokba aika atalokogo, ajisüaka Modi-i ola madoker,” ta paisa shisem.
Brihostibar nü Purnia lenisüba nung NCSC nungi teshimtet telok kati Scheduled Caste nüburtem atema Tripura state sorkari benokba programme aser schemes reprangshitsü atema anogo asem state semdanga lir.
NCSC Mendenbuba-isa, tang linük nung lokti tsüngda mepetmesü tensa anema lungkak aita kaket zülurtem, scientist tem, sangro mejemertem, artist tem aser shisashir mongintemi award meyipa agütsüdagi, ta ashi.
“Lungkak aiter shisashir mongintem ya Congress pusemertem ta BJP-i tai tongloktsür, iba ya tim masü. India nung mepetmesü tensa ya süoki ia agia Modi-i pa tebang lapoktsüla,” ta Purnia-isa ashi.
“Taoba mapangtem nung India nung kodanga item tatalokba maliasü. Taoba mapang Ato kilonser Atal Bihari Vajpayee mapang nunga iba tensa maliasü,” ta paisa ashi.