Goa nung taoba Catholic putir tasümang ayong nungi agitetogo

Panaji, November 07 (Agencies): Goa nung mangatettep aliba ali project tem anema noktaksang aser taoba mapang Roman Catholic order of Blessed Sacrament Fathers nungi putir, Bismarque Dias tasümang Honibar nü St. Estevam island anasa aliba Mandovi ayong nungi agitetogo, iba sülen opposition party aser lokti tentettemi iba ken o bushisüngdangtsü akhang tenzükogo.
Taoba mapang Roman Catholic Putir, Dias samaba sülen ghonda 24 sülen pa tasümang nguogo.
Old Goa police station nung police ketdangser, Krishna Sinari-i, Brihostibar ayaterm nungi tenzüka police-i Dias tasümang bushia liasü, pa süoshi, mobile phone aser tanga osettem ayongküm nungji angu, ta ashi.
Iba dak sentakba nung police-i, lanur anati Dias parnok ayongküm nung party lia beer jema liasü ta shiogo, ta ashi.
Goa nung Aam Aadmi Party (AAP)-i, state sorkari iba kuli junga bushisüngdangtsüla ta khangogo.
Panaji nungi kilometer 45 shi pila oor Tuem nung greenfield airport, golf course ka aser electronic city atema ali agiba anema lokti tentettemi lungkak aitba nung Dias-i shilem agia aruogo.
Dias-isa par yimtak temzüng alema lenmang yangluba ken o Pune nung aliba National Green Tribunal bench nung benoka liasü.
Par medemer, Sudeep Dalvi-i, taoba mapang nunga Dias amokmerena liasü, ta ashi.
Dalvi-isa, Dias ya tzü awar tajung ka liasü aser police-i pa yi agi meseper liasü saka tzü awai ao südi ta jembiba nungji melung malemtsü lir, ta ashi.