Vyapam ken o nung Cong-i Dharmendra Pradhan aitsü

New Delhi, July 15 (Agencies): Madhya Pradesh nung Vyapam ken o bushisüngdangtsü asoshi Supreme Court-i Central Bureau of Investigation (CBI) dang tuyuba sülen anogo ishika tsüngda tanü Congress-i iba ken o nung Union Petroleum Minister Dharmendra Pradhan aitsüogo.
Osangbenertem senden ka nung jembidang Congress lenir Randeep Singh Surjewala-i, Vyapam ochimashi ajanga tajangzük anguba senji BJP minister tem, MP tem aser RSS lenirtem tsüngda lemsatepa agiogo, ta ashi.
2011 küm Vyapam ochimashi nung tongti Sudhir Sharma’er ki mita reprangba mapang anguba Income Tax department osang nung ajemdaker Surjewala-i, senji yimya balala aika nung parnok lemsatepa agiogo, aser item rongnung kaji travel expense atema liasü, ta ashi.
“Vyapam ochimashi nung tongti Dr Sudhir Sharma den Lakshmikant Sharma nati iba senji Union Minister Dharmendra Pradhan dena lemsatepogo,” ta Surjewala-i ashi.
Pai ashiba agi, Sharma’er ki mita reprangba mapang anguba kulikaket ka nung Sudhir Sharma-i Dharmendra Pradhan nem air ticket atema sen agütsüba zülua lir.
Ano Bharatiya Janata Party tatong Tir Prabhat Jha aser par jabaso Tushmul Jha aser Ayatan Jha nunger atema senjia Vyapam ochimashi nung aija alir kati agütsü, ta Congress lenirisa ashi.