Taiwan Tir, Ma-i China lenisang, Xi den ajurutepogo

China Tir, Xi Jinping (Achijilen) aser Taiwan Tir, Ma Ying-jeou nati Singapore nung tanü Honibar nü ajurutepba noksa nung angur. XI o Ma nati tan ajurutepa senden amenba ya par linük lenir anati küm 60 tsüngda nung tan mezüngsüa ajuruteper lir. (Singapore, November 07)

Singapore, November 07 (Agencies): Taiwan Tir, Ma Ying-jeou-i China Tir, Xi Jinping den Singapore nung tanü Honibar nü otsüsütsüsa ajurutepa senden menogo.
Ma o Xi nati tan ajurutepba ya par linük lenir anati küm 60 tsüngda nung tan mezüngsüa tsüngdong ajurutepa senden amener lir.
“China-i Taiwan Strait nung tongpang nung amshitsü missile-tem yutsütsü tenzükba onük tanü senden nung benok saka missile-temji ozü Taiwan anema yutsü masü ta China lenisang, Xi-i osang jangjashitsüogo,” ta tanü Xi den ghonda 1 shi agia senden amenba sülen Ma-i metetdaktsü.
Ano, par linük anati kati ka akümtsübotepa par linük anati tongpang merarai yimjung nung lia par linük ana tsüngda tesendaktep tajung ayutsü asoshi tenati nangzüktepba olen ka pai lemsatep.
Taiwan par yimli kübok aiter ta züngshiba China linüki Taiwan par yimsüsü kübok tanaben anioktsü asoshi mitkar tashia amshitsü renemba osang taoba mapang metetdakja lir.
Ajisüaka, China yimli kübok tanaben malitsü asoshi Taiwan nüburtemi alizüng tulu ayuba osang jangjaogo.
Ano külen, par linük ana tsüngda tesendaktep tajung yua yimji yimjung nung alitsü nangzüktepba osangji China lenisang, Xi-ia tanü jangjashitsü.
“China aser Taiwan nati tesüiba mapang ajurushiba mangatettepbaren tanaben matalokdaktsütsü nükjidong tulu nung Ma künati tanü senden menogo. Linük anaprongla nung nüburtemi yimji yimjung tia nung alitsü asoshi alizüng yua lir kechiyong China o Taiwan na ya azü agi mezütepba adianu ama lir,” ta Xi-i tesülen metetdaktsü.
Tir Ma-i 2008 küm nungi tenzüka Taiwan lenisütsü menden benokba sülen tanü tashi nung par linük ana tsüngda shishilembatsü tezüngzüktep 23 tashi agia, par linük ana tsüngda tesendaktep taoba mapang nungi tang kanga agi tajungba akümba osang bushiteta lir.
Ano, Taiwan-i par election sentong agitsü hopta ishika anünga alidang Taiwan aser China lenir nati tan ajurutepa senden amener lir.
Xi-i tan Ma den Singapore nung tan ajurutepba jakdang Vietnam linüka yashi Hokolbar nü semdanga par linük ana tsüngda tesendaktep tajung ayutsü tenzüngzüktep agiba osanga jangjaogo.