Dimapur nung tashiyim agi sen sarur 3 apu

Dimapur, November 7 (TYO) : November 5, 2015 nü Dimapur Police-i MST area, Dimapur nung ozüng alema sen sarur nisung ana apu.
Nisung anaji Tangai Phom’er jabaso Simon Phom aser Jitun Das’er jabaso Joyanto Das na ta jangjaogo aser Simon Phom-i pa GPRN/NSCN nung ‘Kaphur’ inyaker ta kuli agütsü, ta Addl. Dy. Commissioner of Police/PRO Dimapur-i sangdong ka nung metetdaktsü.
Tenati tashiyim agi garitem indang annual tax saru aser sen magütsürtem indang gari sapi rakzük, ta police-isa ashi.
Ano, November 6 nü Kailash Prasad’er jabaso Anand Prasad-i FCI Depot Complex nung Manipur-i aoba truck garitem dang nungi sen saruba atema apu. Pai NSCN/GPRN (IM) tenüng nung sen saruya liasü aser pa ket nungi sen 17,000 den coupon booklets bena aliba ngutet, ta sangdong nungsa shia lir.
Dimapur Police-isa Railway Station anasa aliba Taxi Stand nung mejangjatetba tsümar tasümang ka nguteta lir. Iba nisung ya arishi küm 50 shi tain lir aser District Hospital Morgue nung yua lir, ta Addl. Dy. Commissioner of Police/PRO Dimapur-isa metetdaktsü.