Anupam Kher-i anir ‘March for India’ sentong agi

New Delhi, November 07 (Agencies): Honibar nü actor tain, Anupam Kher-i anir New Delhi nung ‘March for India’ lungkak aitba sentong kaogo aser iba lungkak aitba sentong nung pai, India ya akhümtsübutep aliba linük ka lir aser aji oda masü, ta jembitsüji nisung shinga dak-a temeten mali, ta ashi.
Linük nung akhümtsübutep mali aser mepetmesü lir ta ola adokba anema ayongba sentong nung Bollywood actor Kher-i, “Linük ajak nung tebilemtsü onük karbosa lir, ajisüaka asen linük ya akhümtsübutep maliba linük ka ta jembitsüji nisung shinga dak-a temeten mali,” ta ashi.
Actor aser BJP pusemer Kher-i India ya akhümtsübutep aliba linük ka ta bilemer aser pa lenisüba nung tanü Central Delhi nung India Gate nungi Rashtrapati Bhavan tashi lungkak aita jaja liasü.
Tanü iba sentong nung Kher kinüngtsü aser BJP MP, Kirron Kher, film yanglur- Madhur Bhandarkar aser Ashoke Pandit na, artist tem aser kaketzülurtemi shilem agiogo.
Kher-isa, pai Tir Pranab Mukherjee ajurua pa dang India ya akhümtsübutep aliba linük ka ta ashitsü, ta metetdaktsü.
Linük nung akhümtsübutep mali ta shia lungkak aita award meyipa agütsürtem anema lungkak aita jajaba sülen nikongdang Anupam Kher-i Ato kilonser Narendra Modi aser Tir Pranab Mukherjee naprongla ajuruogo.