TR Zeliang-i nübortem dang sorkar den yariteptsü mepishir

November 5, 2015 nü Nagaland chief minister TR Zeliang-i French telok den ajurutepdang agiba noksa angur.

Dimapur, November 7 (TYO) : India sorkari Smart City tem tendanga tenzükba rongnung Kohima densemtsü atema Kohima nung alirtemi amalitep alitsü mepishir ta Nagaland Chief Minister TR Zeliang-i tanü ashi.
Iba mapatong takok ngua inyaktsüba asoshi sensotem shilem tuluba lir. India sorkari Smart Cities tenzüktsü asoshi mezüngpur shimba rongnung Kohima dendaktsütsü asoshi sorkari merangtsü, ta TR Zeliang-i metetdaktsü.
Linük nung Smart City yanglutsü atema India sorkari yimti 20 mezüng shimtettsü sentong lir.
Iba mapatong asoshi Kohima Village Council-i sorkar den yariteptsü ta nangzükba atema chief minister-i parnok dang pelaba metetdaktsü.
“Public teyari medenra sorkari dangbo kechisarena ajak nung terenlok bener marutettsü” ta paisa ashi.
Honibarnep Dimapur nung sorkar ketdangser kar den ajurutepa sensaksemdang TR Zeliang-i iba olen jembi.
“Kohima nung closed-circuit televisions (CCTVs) 200 aser Dimapur nung 300 enoktsü sentong lir. Iba mapa ya DGP-i ketdangsüa inyakdar aser kobi melii tembangtsü. Tongtipang tesemtem nung CCTVs enokba ajanga ozüng alema inyakba mapa ajema akümtsü ta onoki imlar. Iba dak sendakba nung ki kiburtemi ozüng amertem den yariteptsüla” ta chief minister-isa ashi.
“Taküm June ita New Delhi nung ni France Ambassador den ajurutep aser iba sülen pai pa den yariteper Jean René Cougard aser telok ka Nagaland semdangi yok. Onoki French telok den Kohima nung Ropeways yanglutsü indang tebilemba lemsatepogo. Iba ya mapa küma inyaktra Ministers’ Hill nungi PHQ, Old Secretariat area nungi Bayavu, High School Junction aser New Secretariat tashi yanglutsü” ta paisa ashi.
“Kohima nung Ropeways yangluba ajanga senzüsenbongertem aser talisa office-i aoertem kanga tajangzük angutsü. Iba ya senzüsenbongba atema dang masü saka Kohima tobur tajungba kümdaktsütsü” ta TR Zeliang-isa shisem.
Paisa ashiba agi, iba mapa dak sendakba atema tenangzüktep ano magii saka France nunger teloki iba mapa asoshi bilemdangtsü mulunga agizükogo.
Municipal Affairs department-i Kohima nung Ropeways mapatong atema tang teinyakdak lir aser iba asoshi Rs 400 crore den timba endoktsü.
France nungi aruba teloki Nagaland nung solar power generation, ak metsüba den shi alepdak aser sustainable development nunger mapatem inyaktsü jangraba metetdaktsüogo. Tan ita tatemlen New Delhi mesüra Nagaland nung maneni parnok den ajurutepa senden ka agitsü sentong lir.