Onsara talila tenüngsangtepba yimya yabo melenshinung koda ???

~ L. Kika Pongener – Aoyimküm, Dimapur.

Alima tashitemetet renloka aoba den külemi kija taküm loktiliba libaliroyim aser awashi yimya ajak tajungba tajungba melenshiyonga yanglushia aor, ibala sobalibaji kangasa topur tajung lir. Ajioda, asenok rongnung yimtsür-yimer, sensopur, pur-medemsor aser adianu kari tangar dang nungi alakteta mapa tajung kar inyaktetba ajanga Reward, Award, aser Degree tulu kar nguteta yimtsür-yimer aser sensopur nem konang- nüngsang bentsür arura, ano adianu kar UPSC & NPSC ajanga tatidang agiba nungi Gazzetted Officer menden tulu kar nung takok ngura,ano kaketshirtem rongnung kari First Class mesüra First Division nung top position tongtetra, mesüra adianu kari Matric aser Higher Secondary Level Examination nung top position tongtetra iba ama mapa tajung inyaktetba asoshi kati ka tushitepa ajungshitepba sobaliba awashi yimyaji kanga tajung, kechiaser ibala ama kati ka nem mapa tajung inyaktetba asoshi tenüngsang agutsütepba ajanga ano tanüngba tangar asoshia tatishitsü tajung aser tayongzükba tulu asütsü. Ajisüaka ibala kati ka tushia tenüngsang agütsütepba nung ya temetongshitsü aser temelenshitsü kar lir amai ajitetba kar ni iba ocet ajanga lemsatepnür.
Hau nii… mapa tajung nungji ajaki pelar aser tenüngsang agütsüner,ajioda UPSC & NPSC Exam ajanga tatidang agiba nung takok ngua mapa angurtem rongnunga IAS, IFS, IPS, NCS & NPS yamala mesükba Class-1 Gazzetted Officer jenjang tashi tongtetra, aser sorkar department kar nung tekolak menden (Head of the department) tashi tongtetra, (Promotion) aser ano nisung kari tangar tang nungi alakteta State, National aser International level nung Award & Reward tulu kar ngutetra senso-i mesüra putu yimsüsür-i yimtsür-yimer ajunga tenüng nung tushia tenüngsang agüja osang kaket nung zülura aji agi peritsü amai bilemer. Kaketshirtem rongnung kari Doctorate degree tashi ngutetra, Matric, Higher Secondary & Degree level nung Top position tongtetra mesüra First class/First division nunga top position nung passed sütetra, pei pei aliba jila nungi Students’ Union-i tenüngsang aguja osang kaket nung adoktsüra aji agi peritsü amai bilemer. Ajioda UPSC & NPSC Exam ajanga süaka Non-Gazeetted post mapa kar anguba mesüra Degree kar nung First class/First division nung passed asüba yamala ajunga osang kaket nung adokba yabo tera pongpa-pongpar amai bilemer. Aser kodang iba amala mesükba mapa kar atema osang kaket nung adoka ngudir par yimerbo mesüra par kin nungibo tanü tashi yamala post menden tongteter mesüra pass süteter-a shinga mali asü koda (?) ta tasüngdangba arur. Aser ano aji dang masü mapa ka nung takok anguba asoshi kidang kimang, sosemdangsem, kin-kidong,yimtsür-yimer,ilangtsür, pei pei taliba jila nung union balala nungi, Tzükongsanger, alu züngar aser oda kiyong – kidanger tashi agi anogo shia melentepa osang kaket nung nisung ka kija noksa & tenüng zülur adoka angudang tenüngsang tetushi melena talaktsü ka tang kümdaktsür. Aser ano aji dang masü rongsen indokba tsütsülen shisadangra osang kaket ka nung advertisement ka agütsüba nungji sen kwika adoker asenok ajaki kanga junga meteta lir,aser osang kaket ka nung danga masü osang kaket takaba ajunga nung zülur adokdangji senotsü kwika intoker’ar ibalaji kanga aroka shisadangtsüla. Anungji akok ka asunungbo Award, Reward, Gazeetted post menden tulu atongba asoshi senso-i aser putu yimsüsür-i yimer ajak tenüng nung tenüngsang agutsüra aji agi peridaktsü nung koda …??? Ano First class nung top position amala nung pass asür aser oda Doctorate degree tashi tongteter asoshi-ji Kaketshir telongjem-i ajak tenüng nung tenüngsang aguja zülura aji agi peridaktsü nung koda ? Ashiko kar asoshibo ni lemsatepba ya tamashi amai bilemtsü akok aser mapa tajung inyaktetba nung tenük meremer amai mesüra tenüngsang magütsüner amai angatettsü akok. Ajisüaka, tsürabur shin o nung yamai ka shia lir ” Ninang mochitsü tachitsü tanang aser tajung, saka talila chira saaktsüher “. Kechi mapa südir süaka tali-tapongjibo majung. Anungji kokrabangla asenok Aotsür-Aoer-ibo tashitemeteter tangateter aser tesayur kin ka ama kechisarina ajak nung penja-penjaa mesüi lemtet-lemteta,bentet-benteta aser sadem-sadema tangar ajak asoshi tatishitsü tajung sayua inyakra aser zülura koda jangratemtsü ka asütsü aser topur tajung asutsü. Anungji mapa tajung inyaktetba nung kati ka tushia tenüngsang agütsütsü mamadokli, ajisüaka telok telok balalai mapa kasa asoshi nisung ka onsara talila tushitepa zülutepba yimya yabosa melenshinung jungdisü ta iba ocet ajanga lemsateper.