Romania mi lendong nung asür nisung 44 jungogo

Bucharest, November 08 (Agencies): Taoba ita Romania club ka nung mi lendong atalokba ajanga Deobarnü tashi nung nisung 44 süogo.
Mi agi kanga mejungi yirur alirtem yaritsü asoshi bendang linüki NATO aser Romania army tayimtsü tem nung bener aotsü, ta ketdangsertemi metetdaktsüogo.
Iba mi lendong nung yirur nisung 100 shibo tang tashi Romania nung aliba mozü kitem nung yaridar. Parnok rongnung karbo tasü taküm tsüngta lir, ta ketdangsertemi ashiba Xinhua news agency ajanga metetdaktsü.
NATO army tayimtsü ka nung teyirur nisung 10 Britain-i taneptsü bushia anir aotsü aser kanga mejungi yirur alir kar Romania Air Force tayimtsü nung Norway, Finland aser Hungary linüktemi taneptsü bushia anir aotsü, ta Defence Ministry sangdong ka ajanga Deobarnü metetdaktsüogo.
Teyirur aika Netherlands aser Belgium linük temi anir oa lir.
Romania nung küm aika sülen iba ama nisung aika samaba lendong, tesüiba October 30 aonung, nightclub ka nung atalokba ya mezüng lir.
Lendong atalok aonung parnok 26 tashi asü aser kabo mozü ki tongli asü.
Iba lendong ajanga yimsüsübaren nunga mepetmesü adokogo. Nüburtemi iba lendong atema yimsüsürtem dang takhangba balala agütsüba ajanga linük Ato Kilonser Ponta-i Bodhbarnü pa menden nungi alutsü shidi agütsüogo.
Tang linük nung yimsüsüba tsütsü koda masüba tensa kati ia lir kechiba süra tang yimsü tesüdak Social Democrats party-i tekaratiba nung temzüngi tuyuba ama sorkar tasen ka akümtsü tebilemba lir.
Election kara agitsü asoshi parliament anena atatsü atema yimsüsürtem ajak anentsü, Opposition, National Liberal Party-i sangdongogo.