Myanmar nung Naga nungertem temulung meyipner

Dimapur, Nov.08 (TYO) : Myanmar (Burma) nung Nagaland den alushi agi sendaktepba aliba Naga nunger kin aika lir aser item rongnung aika Buddhist yimsü amangertem lir, kechiyong parnoki Yisu Khristaji dang meimchir asoshi kümtetdakba kibur ta agizüka amangtsüba lenmang memetet ta iba osangzülur den sensaksemdang Myanmar Naga lushi nung Tsüngrem mapa inyaker Wb.Imlisuai metetdaktsü.
Pa tawa Longwa nungi anogo asem tashi agia Myanmar Konyak lushi ajanga Leinung kin aliba lushi tashi orr aruogo. ” Ni kenü Leinung nunger tambur ka ajuru aser paji Buddhist yimsü amanger ka liasü. Parnoki Buddhist yimsü dang “Poktra Para” ta ajar. Ni iba tambusang dang, pai Khristan kümner asü mekümner ta asüngdang, idangji pai Khristan kümner saka komaser Khristan akümtsüar memetet ta ashi,” ta Imlisuaisa metetdaktsü.
Leinung kin ya Myanmar Konyak lushi ajanga orr mezüng asenoki ajurutsüba Naga kin rongnung ka lir. Iba kin kübok yimtsüng 90 lir saka tang tashi nung yimtsüng 20 nung dang arogo tenteta tamangertem lir. Item arogo 20 longjemer Leinong Baptist Churches Fellowship tenteta lir. Iba fellowship ya mission center ka lapoka lir aser yangji tang okshi tu agi yangluba mission ki pezü yanglua lir. Ano, tebilemtsü kaji iba mission nung tenzüktsü asoshi nisunga mali aser rongsena makaba tia nung parnok tanüla nung aser alima rongsen nung teyari kanga nüngdaka lir.
Iba lushi nung tenzüka aliba arogotem tenla kiji asen lima nung nashi aser ak ki danga tamajungba tia nung lir,(noksaji reprangang) anungji tanüla anir aruba mapa den külemi ano amangba purtem asoshi tenla ki yanglutsütsübaji kanga rongdak nüngdak mapa ka kümogo ta Tsüngrem tenzükerisa ashi.
Parnok nemji asenoki Tenla ki koma yanglutsütsü ta asüngdang dang, “Tenla kiji yinjung agi yanglutsü, anungji asenoki yinjung agi Longwa yim mesüra Mon tongtsüra, parnoki yinjungji tekolak nung bener aitsü aser süngjibo par lima nung arangtsü. Ano, kisürtem kari Tsüngrem mapa inyaknüra, parnoki oa kiji sütsütsü akok,” ta Imlisua-isa ashi.
“Leinong kin ya Ao kin den sobaliba aser libaliro yimya aika mesüktepa lir. Parnoki kiji longmi atem ajungketa asenoki atakba ama ataker aser sünglang yanglur. Parnok shikari nungi adokdang ajurushi agütsür. Ano, parnok mapa inyakba aser khu abenba yimya nung tetsür tebur kecha tebendang mali yaritepa dang inyaker aser tanura yamaji anepalur,” ta paisa metetdaktsü.
Iba kin asoshi tamang sarasadem, nübo aser rongsen kanga nüngdaker ta paisa metetdaktsüogo.
[Myanmar Naga lushi nung Tsüngrem mapa inyakner aser tenla agütsüner lira Tir Yimyim yimozülur den mobile number 9436002285 ajanga jembitsü mepishir mesüra mashi mapang ka nung ajurua jembitsü akok.]