Bihar election ajanga Assam election-a kongshitsü: AIUDF

Guwahati, Nov. 08 (Agencies): Tanü All India United Democratic Front (AIUDF) tongti lenir, Badruddin Ajmal-i, Bihar election osang ajanga nüburtemi communalism aser telemsa adokdaktsüba yimtenren anema vote agütsüba sayuogo, aser iba election ajanga Assam assembly election-a kongshitsü, ta ashi.
Assam, Dhubri nungi MP, Ajmal-isa ashiba agi, “Bihar election osang ajanga, linük nung tamangba yimsü ajak sadoka amangtsü aser benshitsü lateta alibaji nüburtemi maneni wazüka yunuba sayur.”
“Nitish Kumar leniba nung grand alliance-i takok anguba atema onoki tenüngsang agütsür. Iba election osang ajanga nüburtemi communalism aser telemsa adokdaktsüba yimtenren magizükba kuli sayuogo,” ta Ajmal-i ashi.
Ajmal-isa, Bihar election ajanga BJP mapatongtem jungkai adoka sayuogo, ta ashi.
“India nüburtemi BJP indang communal politics maginer. Bihar election osang ya secularism ajanga takok anguba lir,” ta Ajmal-i ashi.
Bihar election osang nungi BJP-i tangazükba angutsüla ta shia pai, “Bihar election osang ajanga Assam-a kongshitsü. Assam nunga BJP-i tongtibang onüktem kar nung, talisa hydel power project tem aser Bangladesh den ali melentepba tezüngzüktep nung temelung meyipshiogo. Communal politics anema Assam nüburtemi akhanga noktaktsü,” ta ashi.