Ao Baptist Arogo Diphupar tenla ki tasen meshitetogo

Dimapur, November 8 (TYO) : Kanga dang yongya ataba sülen Deobarnü ABAM, executive secretary Rev. Dr. Mar Atsongchanger-i Ao Baptist Arogo Diphupar tenla ki tasen meshiteta semzüktsüogo.
Iba tenla ki ya December 2011 nungi yanglu tenzük aser küm 4 ser ita 11 lir külen tanü semzükogo. Nisung meyirjang 2500 amentsü yangluba tenla ki nung AC enoka lir aser iba ki ya sen crore 8 ser lakh 14 endoka yangluogo. Tenla ki tsünglanglen taktang 21 lir aser itemji arogo office aser tanga nüngdaktem atema amshitsü.
Rev. Dr. Mar-i ‘Ibai Kotak kikümbang’ onük jembidang, arogopurtemi tenla ki lendong nungi kümzüka ayutsü ayongzük.
“Tenla ki kümzüka meyura züngsemtem lendong nungi jenbua mali aser asenoki tenla ki tazüng yura, tenla ki yangluba tetezü mali. Arogopurtemi iba tenla ya Tsüngrem den ajurutepba tesem ka kümdaktsüdi,” ta paisa ayongzük.
Tenla ki meshitetba sentong nung Diphupar ‘B’ Ao Baptist Arogo sannüker Lanu-i temoatsü meshia sarasadem aser Diphupar Pastors Fellowship Pastor, Treasurer Ratna Tamang-i tenüngsang agüja tembang.
Sentong nungsa Construction committee Convenor K. Tsukti Jamir-i tenla ki yangluba osang metetdaktsü aser Sentirenla Lucia o arogo choir-i ken ajanga shilem agi.