England, Wales nung tepukdak toku yanglutsü

London, November 09 (Agencies): Victoria mapang nungi aliba tepuokdak tesemtem nisung alitsü atema ayoktsü tebilema nung England aser Wales na nung tepuokdak tesem toku yanglutsü, ta Britain sorkari Hombarnü metetdaktsüogo.

Item tepuokdak tasentem ya century 21buba asoshi peta yanglutsütsü, ta Chancellor George Osborne treasury sangdong ka ajanga ashi.

Tepuokdak alir parnok nisung 10,000 shi tang yanglutsü aliba tepuokdak tasentem jagi yoktsü aser ibaji ajanga sen million pound 80 ($120 million) kümzüktettsü, ta The Guardian ajanga metetdaktsü.

Iba tepuokdak toku rongnung pongubo 2020 tashi nung lapoktsü sentong lir.

Tepuokdak tejentem indang kimung nung talitsü ki 3,000 shi sütettsü, ta kasa sangdong ajangasa shi.

“Iba iyankyim ya terenlok dak rangloker inyakerba lir. Tepuokdak tesem tanü asüng tensa den peta yanglutsütsübaji nükjidong tulutiba ser iba sentong ya yangluba lir. Tang aliba tepuokdak tesem aika Victoria mapang nung asübatem lir,” ta Osbourne-i ashi.

“Onoki tepuokdak tesem kanga junga yanglutsü tebilemba lir. Iba ki nung puoka ayurtem anisüngzüka temelenshi anguba ki asütsüsa yanglutsü. Anungji ibaji atema onoki yimti nung aliba tepuokdak tejentem shibangba sülen item kimungji talitsü ki yanglutsü asoshi ayoktsü,” ta pasisa ashi.