BJP lennir tejentemi party inyakyim aitsür

New Delhi, November 10 (Agencies): BJP nung lennir tejen pezü- LK Advani, Murli Manohar Joshi, Shanta Kumar aser Yashwant Sinha nungeri Bihar assembly election nung party-i takok manguba atema sangdong ka ajanga BJP inyakyim aitsüogo.
“Bihar elections ajanga Delhi nung tamakok anguba nung party-i tatishitsü magiba sayur. Iba tamakok ya party rangben tashimaitba ajanga lir aser iba nungji shinga mezüngdoker,” ta sangdong nung shia lir.
Kasa sangdong ajanga, “Bihar tamakok ajanga ketdangsüa inyaktsü asoshi mapa nunglokja alirtemi nendaka meinyakba sayur,” ta ashi.
Osang ajangasa ashiba agi, iba sangdong ya Joshi’er kidang parnok lennir pezü ajurutepa minute 10 tsüngda nung zülua renemba lir.
Tan Bihar elections nung MLA 243 nungi NDA 58 ang adokba ajanga Modi-i aniba sorkari ita 18 nung inyaktetba noksa sayur ta aikati takzür.
Opposition party, Left-ia, ibai NDA nung tanishisang Ato Kilonser, Modi kija asoshi tamakok mesüka lir, ta ashi.
Tesüiba mapang Union minister aser Modi sapur, Arun Shourie-i, iba tamakok ajanga Ato Kilonser Modi aser Amit Shah nati tali teyak asanger ta aikati bilemba, parnok telung inyakyim tali tashi itshitsü, ta Hombarnü ashi.
“Delhi election kanga pungba agirtemia Bihar tamakok ya shishia agitsüla kechiba süra Bihar election ya Nitish Kumar aser Narendra Modi na chitepa raraba amai lir,” ta Shiv Sena-i ashi.
Aji oda süaka, home minister Rajnath Singh den BJP nung lennir tejentemi, iba tamakok ya Modi tai ajanga lir ta meshitet, ta metetdaktsüogo.
Singh-i, “Ni rally 50 shi agiogo saka Bihar tensa junga mangatet südi,” ta ashi.