Nagaland State BJP Unit-i MGNREGA atema CM dang mepishir

Dimapur, November 10 (TYO) : April 1, 2008 nü NREGA nungi “Mahatma Gandhi National Rural Employment Guarantee Act” (MGNREGA) ta melenba temzüng ajanga Nagaland State kübok yimtsüng tia nung aliba tesemtem nung shilem tulu agir. Iba temzüng kübok kilen shia nem anogo 100 mapa inyakba taa agütsür, ta BJP Nagaland-i sangdong ka nung metetdaktsü.
Ano, MGNREGA indang nükjidong kaji tesem nung nüngdakba lenmang, tzü mesür aruba, awatsüng, tzübu nungertem yanglutsü atema lir. Iba temzüng nung tenüng agütsür shia nem mapa lemzüktsütsü aser taa agütsütsü lateta lir. Tenüng agütsüba sülen anogo 15 tsüngda mapa magütsüra, tenüng agütsür shia nem unemployment allowance agütsütsü lateta lir, anungji MGNREGA kübok mapa angutsübaji ozüngi temeten agütsür, ta sangdong nung shia lir.
Ajisüaka, asenoki asen Nagaland state reprangdangra, iba inyakyim khenyongi balaka lir. 2014 nung anogo 10 nungi 14 atema dang taa agütsü aser 2015 nunga anogo 100 nungi anogo 3-4 ka atema dang taa agüja lir. Ministry of Rural Development nungi osang tejangja angazükba agi, Nagaland sorkari state lemzükba shilem magütsütetba agi taa magütsüteter, ta General Secretary & Spokesman, BJP Nagaland, K. James Vizo-i sangdong nung shia lir.
North East kübok aliba state 8 nungi Tripura aser Sikkim nung dang MGNREGA kübok tangutsü senotsü shitak angur kechiyong parnoki state lemzükba shilem mapang shitak nung agütsür, ta paisa shisem.
Prime Minister Narendra Modi aser Finance Minister Arun Jaitley naprongi MGNREGA scheme maneni inyaktsü aser sensaker shinga mapa mongui meyutsütsü ta nangzükogo.
May 14, 2015 nü Ministry of Rural Development (MoRD) – Dr Silpa Pandey, Research Officer UNDP, in charge Nagaland MGNREGA aser Prasana V Salian, Assistant Commissioner, MGNREGA nati Nagaland nung MGNREGA schemes inyakba mapatem reprangi aru aser Dr. Silpa-i jembitsüba sülen ang Nagaland nung VDBs atema sen crore 123 angu.
Iba khuret atema BJP Nagaland-i inyaktsü junger ta asüba tebilemba kar lemsateper aser mezüngbuba nung, Nagaland kübok VDBs ajak nungi administrative charges aser management costs atema ta ser 40% agizük ta osang angazüker. Anungji iba sen jagi state shilem agüka ali nung ajungtsü.
Tanabuba nung, Nagaland nung VDB ajak nung GIA-Grant in Aid ta ser lemzüktsür aser iba ya yimtsüng shia nem agütsüdangbo sen aika lir. Anungji state-i MGNREGA sen lemzükba magütsüteti tetsüdaktsü ajurua GIA-Grant in Aid sen ya amshia ata nung ajungtsü aser ibaji tatsüka lir meyiptsütsü akok, ta sangdong nungsa shia lir.
Item onük nung ajemdaker BJP Nagaland-i Nagaland Chief Minister dang iba khuret atema mapa inyaktsü aser bangdakpur den inyakyim metongshitsü atema mepishir. Ibaji inyak nung Nagaland nung alirtem kanga ajangzüktsü, ta BJP Nagaland-isa metetdaktsü.