EU-i Africa linüktem nem teyari sen billion 1.8 agütsür

Malta, November 11 (Agencies): European Union (EU) aser Africa nunger lenir 60 dak temai Italy kübok Malta nung tanü Bodbar nü aser asüng, Brehostibar nü ajurutepa Africa nung alir nüburtemi pei linük toktsür Europe nung jenoka alitsü asoshi Europe bushia aobaren den sentakba onük balala benoka jembitsü renemba osang jangjaogo.

Tan senden nung Africa nung alir nübur meyirijang jenti pei linük toktsüba, migration den sentakba maparen ozüngi melaba ama inyaktsü, migrant nisungtem kümzüka ayutsü, ozüng alema nisung shibelenbaren nokdangtsü aser Europe nung jenoka alitsü asoshi temeten manguba nüburtem pei linüki tanaben meyipa yokba maparen nung Africa linüktem den amalitepa inyaktsü onüktem benoka jembitsü renema osang ka European Council nung Tir, Donald Tusk-i tanü metetdaktsü.

Ano, nüburtemi pei linük toktsür Europe nung jenoka alitsü merangbaren azüoktsü maparen nung yariteptsü nükjidong nung EU-i Africa lenirtem nem dollar sen billion 1.8 tashi teyari sen agütsütsü renemba osang jangjaogo.

Taküm 2015 küm tenzüker tanü tashi nung Africa nunger nisung 800,000-i tzüyim ajangdanga Europe tonga aoba osang bushiteta lir.

Europe bushia aoba Africa nübur nisung 3,400 dak tema tzüyim nung taküm asüba osanga bushiteta lir.

Tanü Bodbar nüa Europe bushia aoba Africa nunger nisung 14 shi Turkey anüdoklentiptsütsü tzüyim nung arükseta asüba osang bushitetogo.

“Tanü tashi nung Europe nung jenoka alitsü asoshi migrant nisungtemi temelaba agitsü asoshi benokba shiti tendanga reprangshitsü asoshi küm ka dak tema agitsü,” ta EU-i Malta nung tentetba European Asylum Support Office-ia tanü metetdaktsüogo.

Ano, Europe tonga aoba migrant nisungtem sorkari tentetba border crossing-i odaktsütsü nükjidong nung EU nung zünsemba Slovenia linüki Croatia arrtsülen atsü atsüdangba osang jangaogo.