Meghalaya nung AFSPA atema Centre-i SC nung ken o ka benoktsü

New Delhi, November 10 (Agencies) : Meghalaya High Court kati Garo hills nung AFSPA alitsü tetuyuba agütsüba anema Centre-i Supreme Court nung Special Leave Petition (SLP) ka benoktsü.

“Meghalaya High Court tetuyuba anema onoki SLP ka benoktsü” ta Minister of State for Home Kiren Rijiju-i osangbener dang ashi.

AFSPA ajanga Garo hills nung telungpur khuret mokoktettsü ta Centre-i bilemer saka iba ozüng yagi khen atemabo tensa azüoktsü, ta Rijiju-i ashi.

Taoba ita Meghalaya High Court-i Centre dang Garo hills tesem nung Armed Forces (Special Powers) Act, 1958 (AFSPA) alitsüla ta tetuyuba ka agüja liasü.

Chief Justice Uma Nath Singh, Justice TNK Singh aser Justice SR Sen nungertemi iba telemtetba ya agi.

“Tensa azüoktsü atema Centre sorkari Armed Forces (Special Powers) Act, 1958 alitsü telemtetba agitsü akok aser iba nung ajemdaker sepaitemi civil administration den yaritepa inyaktsü” ta High Court-i ashi.

Iba tesem nung telungpur teloktemi nisung 87 tashi tashiyim agi sen meshitsü atema pur ao. Parnok rongnung shishilembar 27, civilan 25 aser ano tanga nisungtem dena liasü. Police aser civil ketdangsertemi parnok tajungtiba agi inyak nunga, iba tensa mazüokteter, ta okadakisa metetdaktsü.

Taoba ita South Garo Hills nung Block Development Officer ka pur aoba aser IB officer ka tepsetba atema okadakisa tebilemtsü khuret abenba shisem.