Advani, Joshi nungeri jembibajibo süoki ia agitsüla: Nitish

Patna, November 11 (Agencies): Bihar assembly election nung BJP-i tamakok anguba sülen party telung aser tema naprongla nung mepetmesü aliba mapang ka nung Bodhbar nü Bihar Chief Minister, Nitish Kumar-i, BJP-i state nung sashia nüboyimogo, anungji temeyiptsüba tesashi alibaji tim dang, ta ashi.
BJP lenir taintem- L K Advani, M M Joshi, Shanta Kumar aser Yashwant Sinha nungeri Ato kilonser Narendra Modi leniba anema ola adokba sülen Kumar-i, “Bihar election atema BJP-i tera tali nüboyimogo. Anungji meyipa arubajia (tamakok anguba) iba denji kasa asütsü,” ta ashi.
Kumar-i state Angh, Ram Nath Kovind ajurua Diwali salem lemsatepba sülen Raj Bhawan kima osangbenertem den jembidang pai, “Advani aser Joshi nati A B Vajpayee den BJP indang telok ka kümogo, aser parnoki party indang langka jembira, ibajibo süoki ia agitsüla,” ta ashi.
Kumar NDA nung aliba mapang Advani den tesentaktep junga liasü. Taküm November 8 nü BJP lenir tain Advani asoba anogomung nunga pai Advani den tasoba anogo salem osang lemsatepogo.
BJP lenirtem Shatrughan Sinha, R K Singh, Hukumdeo Narayan Yadav aser Bhola Singh nungeri party anema jembiba sülen yashi Advani densema BJP lenir tain pezüi Bihar election tamakok kuli bushisüngdangtsüla, ta takhangba agütsüogo.