2040 küm Mokokchung komaka alitsü ?

Mkg. November 11 (TYO): 2015 küm ya Mokokchung town kümer küm 125 ajungba küm lir. Iba küm nüngtem nung Mokokchung Town Quasqui centenary Organising Committee purtemi sentong tapu balala ayongzüka kadagi.
Item sentongtem rongnung Aortem asoshi dang masü saka Naga nungertem asoshi tagitsü tongtibang shilem kaji nübortem rongnung “2040 küm Mokokchung ya kechi komaka asütsü ?” ta asüba nükla aser mangdang nung shisalemsatep tenzükba sentong ya asütsü.
Iba sentong ya Mokokchung Town Quasqui centenary Organising Committee tenüng nung Mayangnokcha Award Trust (MAT) purtemi ketdangsüa agitsü tenzükogo.
Parnoki ashiba agi, küm 125 jakdang British nungertemi parnok yimten mapa inyaktsü aser sepaitem alitsü asoshi mesemtetba tesem tila ka Mokokchung agi tanübo tesem tuluka küma renlokogo.
Iba yimti nung lia Aortem samanir sür tamangba yimsü, kaketshisatsü, lokti aser yimten tajungba küma melenshia ainba nung, saisapong aser kentenmenü ajak nung Naga nunger loktiliba melenshidaktsüba nung tongti shilem agia aruogo. Iba jagi Mokokchung narokümji Samanirtem Lima “Land of Pioneers” ta kümogo.
Samanitsübaji taoba mapangtem asoshi dang masü saka tang aser tarutsü nunga kasa tanüla tangatetba nung inyaktsü khuret lir. Iba jagi dang alima anitsü, anungji Samanir kin ka ama, taruba küm 25 tsüngda asenoki Mokokchung asoshi kechi inyaktsü (?) ta bilemdanga shisalemsateptsüji kanga tongtibang kümogo, ta MAT telokisa metetdaktsüogo.
Iba shisalemsatepba ya tang aliba Mokokchung town telongzük kija bilema inyakba masü saka Mokokchung district rangben renloktsü aser iba jagi tanga district-tem dena kongshia ajangzüktsüsa nükla yur shisa lemsadaktsüner, ta MAT teloki metetdaktsüogo.
Tang aliba ya asenok tsüraburtemi yanglutsüba lima ka nung asenok alir, anungji asenokia asen chirnurtem alitsüba lima ka yanglutsütsübaji asenok khuret asütsüla, ta MAT-isa metetdaktsü.
“2040 Mokokchung Nükla” nung shisalemsateptsübaji lokti aser sobaliba ainba nung, alima meimba shisatsü agi yimten aniba aser yimten nung nübortemi shilem agiba, peisasa inyaktetba mapatem inyakba ajanga rongsen züindaktsüba aser kaketreju tajung lapoka tim aser nüngdakba shisaliok rendaktsübatem indang shisalemsatepner.
Anungji, asen lima meima tarutsü asoshi shilem aginürtemi item onüktem nungji ajemdaker “2040 küm Mokokchung” ta asüba onük nungji zülur osangkakettem nung December 10, 2015 tashi nung adokdaktsütsüa akok mesüra email ajanga moaaier@gmail.com mesüra akok_n@yahoo.co.in address nung yoktsü akok.
Iba sülen December 15, 2015 nü Cosmos Hall, Mokokchung nung shisalemsatepba senden ka alitsü aser shisalemsatepbatem ajak bendener kaket küma adoktsü.
Iba shisalemsatepba maparen nung Aor dang masü saka tanga kintemia shilem agitsü akok aser tezülurtemi Ao mesüra English oshi nung zülutsü akoktsü.