Australia PM, Turnbull-i Indonesia semdanger

Jakarta, November 12 (Agencies): Australia aser Indonesia na tsüngda tesendaktep tajungba küma yanglushitsü nükjidong nung Australia Ato Kilonser, Malcolm Turnbull-i Indonesia semdanga par lenirtem den ajurutepba osang jangjaogo.

Taoba Australia Ato Kilonser, Tony Abbott-i Australia Ato Kilonser menden abenba mapang nung Jakarta-i ozüng alema mozümora shibelener Australia senso tepsetba aser Canberra-ia Indonesia toktsüba migrant nisungtem Indonesia-i tanaben meyipa yokba den külemi, Indonesia-i Australia anema itangitba ken o benokba ajanga par linük ana tsüngda tesendaktep kanga mejungi akümba osang bushiteta lir.

Ajisüaka, taküm September ita nungi tenzüka Australia lenisütsü menden abensang, Turnbull lenisüba kübok par linük ana tsüngda tesendaktep taoba mapang nungi tajungba akümtsü ta linük anapronglai teimla yua lir.

Ano, par linük ana tsüngda tesendaktep tajungba akümtsü tenzükaka, Turnbull-i aniba Australia sorkari migrant nisungtem azüoktsü asoshi latetba temzüng ozüng tesashi ajema benshitsü aser par tzüyimküm tonga aoba migrant nisungtem dang taochi sayutsü temulungtetba maliba osang bushiteta lir.

Tan anogo ka agia Jakarta semdangsang, Turnbull-i Indonesia Tir, Joko Widodo den ajurutepa par linük ana tsüngda rongsenren tesendaktep junga yanglutsü onük benokba osang jangjaogo.

“Ozü linük na indang tarutsü jenjang tajungba akümtsü aser terenlok alitsü den sentakba tongtipang onük ishika tanü Widodo künati benoka jembiogo,” ta Turnbull-i tesülen metetdaktsü.

Muslim nunger jenti aliba Indonesia aser Australia linük na nung Islamic State (IS) telok densema kiralongrar telok balalai lendong bener arutsütsü tenzükba den sentakba onüka lenir anati tanü senden nung benokba osang jangjaogo.

Tenati ajurutepa senden amenba sülen, lenir anati Jakarta yimti nung tentetba tongti textile shishilembadak semdanga nüburtem den ajurutepa liasü.

Tawa New Zealand linük semdangba densema, Turnbull-i Australia lenisütsü menden benokba sülen tan agi tanabuba bendang linük semdanger lir.