Pak-i China nem ali acre 2000 dak tema agütsür

Islamabad, November 12 (Agencies): Pakistan aser China nati dollar sen billion 46 shi jenjang aketba economic corridor mapatong tanü Brehostibar nü tenzüktsüogo.

China-i Arabian Sea tonga aotsüren temelaba kümdakja Gwada port tajungba küma yanglushidaktsütsü nükjidong nung Pakistan-i China nem Balochistan kübok densemba Gwadar yimti tzüyimkülem ali acre 2000 dak tema agütsüba osanga jangjaogo.

China nung tentetba company-i alimang acre 2000 dak tema nung nungdakba terenlok maparen inyaktsü temeten agütsütsü tenzüngzüktep ka par linük ana tsüngda agiba sülen Pakistan-i iba alimangji China nem agütsü.

“Lenmang aser totzü pipeline balala amshia, China kübok Xinjiang province nung tentetba Kashgar yimti aser Gwador yimti na sendakteptsü mapatong takok ngua inyakba ajanga ozü linük anapronglai tajangzük tulu angutsü,” ta China Foreign Ministry otongdar, Hong Lei-i tanü metetdaktsü.

“Ozü linük anapronglai China Pakistan Economic Corridor (CPEC) mapatong ya amalitepa inyaktsü renema lir,” ta pai shisem.