ASU-i Nov. 14 nü ‘Kohima Shining’ mapatong tenzüktsü

Kohima, November 12 (TYO): Angami Students’ Union (ASU)-i Kohima Municipal Council den yaritepa November 14 nü “Kohima Shining – Never Clean Ever Clean” ta ser mapatong tenzüktsü atema sentong renemer.
Brihostibar nikongtsütsü ASU office, Kohima nung osangbener senden ka alidang, November 14 nü lokti nübodoka amungbaji künü atema dang masü saka mapatong tetenzüker asütsü, ta ASU president Dievi Yano, Convener Organising Committee, Kezhazer Angami aser tanga ketdangsertemi ashi.
“Kohima merüka maküm tashi mapang apir sentongtem ayongzüka agitsü. Tangar shingaia arua asen jila memerüktsütsü, anungji iba mapaji asenoki dang inyaktsü. ASU-i tzükong pezü – Chakhro, Northern, Southern, Western ASU nungi temulunger nübotem meshiogo aser parnoki merükmejuba mapa nung takokba tashi yariteptsü,” ta Kezhazer Angami-i ashi.
November 14 anepdang 7:00 ako nung Forest, Environment & Climate Change Minister, Dr Niekiesalie Nicky Kire-i sentong lapoktsütsü, ta ASU president Dievi Yano-ia ashi.
Sentong lapoktsüba sülen ASU volunteers den public aser ward/colony nung alirtem aser government department temi pei pei telongtet nung merükmeju mapa inyaktsü. Kohima merükmejutsü aser nisungtem asoshi talidak tesem tajung ka kümdaktsütsü atema ASU-i iba mapa ya apiteta inyaker, ta Dievi-isa shisem.
Senden nung Organising committee züngsem Neizokhoto Belho-ia ashiba agi, sangküm nungi ASU-i Kohima merükmejua ayutsü atema seminars aser awareness campaigns ayongzüka agitsü.
November 14 nü lokti nübodoka mapa inyakbaji “Shining Kohima – Never clean, Ever clean” omen nung ajemdaker agitsü aser iba nung Kohima nung aliba Tribe Hohos, Colony aser Ward Panchayats, tetsür, lanurtem, sorkar mapa inyakertem, Arogotem aser tanur-tain ajaki yaritepdaktsünür, ta Neizokhoto-isa ashi.
Iba den külemi kasa anogo nung Kohima temeket nung aliba Kohima village, Meriema, Chedema, Rüsoma, Jotsoma aser Phesama yimtsüngtemia pei pei telongtet merüktettsü mepishia metetdaktsür, ta ASU ketdangpurtemisa ashi.