Tir Obama-i taruba hopta Asia semdangtsü

Washington, November 13 (Agencies): US Tir, Barack Obama-i Asia kübok tentetba Philippines aser Malaysia linük taruba hopta semdangtsü sentong renemba osang ka White House-i tanü Hokolbar nü metetdaktsüogo.

“Asia-Pacific region nung rongsenren jenjang tajungba kümdaktsütsü nükjidong nung ozü Tir, Obama-i Philippines aser Malaysia linük taruba hopta semdanga Trans-Pacific Partnership onük benoktsü sentong renemogo,” ta National Security Advisor, Susan Rice-i ashi.

“Asia-Pacific region nung tensa aser rongsenren jenjang tajungba kümdaktsütsü asoshi ozü US sorkari alizüng yua lir,” ta lai shisem.

Tir Obama-i tan anogo 6 agia Asia linük anaji semdangdang Manila nung taruba hopta amentsü ayongba APEC senden aser Kuala Lumpur nung ayongba ASEAN senden na nung shilem agitsü sentong renema lir.

Obama-i Asia lenirtem den ajurutepdang cybersecurity, tzüyim kümzüka alitsüren, nübur temeten kümzüktsü, kiralongrar anema raratsü aser alima tali tatsükba akümba ajanga tsüngsang mupong balaka küma melenshibaren azüoktsü onüktem benoktsü sentong renemba osang angazükogo.

TPP tezüngzüktep takok ngua agiba ajanga US-i Asia nung tentetba linüktem den rongsenren tesendaktep tajung ayutsü alizüng yua lir.

Ajisüaka, TPP tezüngzüktep agiba ajanga par US nüburtem nem tajangzük tajung bener marutsütsü ta bilema US Congress-i Asia linüktem den TPP tezüngzüktep agitsü onükji magizüki aliba osang jangjaogo.