Paris lendong nung India nunger asüba osang mali: Indian Embassy

New Delhi/Paris, November 14 (Agencies): Kiralongrartemi Paris yimti amakba lendong nung India nunger asüba mesüra yiruba osang kecha mali, ta Honibar nü Indian embassy-i ashi.
“Tang tashi nungbo India nunger asüba osang mali,” ta deputy chief, Manish Prabhat-i TimesNow television channel dang ashi.
“France ketdangsertemi embassy staff tem kimai ayazüka alutsü nokdangba ajanga onoki ground report menguteter aser ibaji nijai metettsüsa lenmang mali,” ta paisa ashi.
Manish Prabhat-i ashiba agi, tang France yimtiba, Paris nung India nunger nisung 100,000 shi lir.
Indian ambassador, Mohan Kumar-i twitter ajanga, “India nunger ajak kümzüka lir ta onoki amanger,” ta ashi.
#ParisAmakba: Tang tashi nung India nunger asüba mesüra yiruba osang mali ta France nung India mission deputy chief, Manish Prabhat-i ashir,” ta Mohan-i ashi.
“Iba lendong ajanga kongshir kibongtem den onok sarasadem lir aser France den tejashi lemsateper,” ta paisa shisem.
Hokolbar aonung kiralongrartemi Paris yimti nung tesem ishika amakba lendong nung nisung 153 asüba aser nisung 200 dak tema yiruba osang jangjaogo.