State education department-i temeshi aini aoba sentong takok ngua agiogo

Kohima, November 1 (TYO) : School Education Department den SCERT aser Nagaland Board of School Education nungertemi Molungkimong yimtsüng semdanga anogo ananü parnoki temeshi aini aoba sentong tembangogo.
Molungkimong ya 1872 küm Rev Dr E W Clark ajanga Naga nunger rongnung mezüngbuba Khristan yimsü agizükba yimtsüng lir.
Tanü Molungkimong süngküm nung Molungkimong Village Council den Molungkimong Baptist Arogo sannüker aser lennirtemi School Education & SCERT Minister, Yitachu aser Commissioner & Secretary F P Solo nati aniba telok pela agizük.
Tanü Molungkimong lennirtemi temeshi aini aoba telok dang parnoki Assam den shishilembatsü asoshi senzüba lenmang aser iba lenmang ajanga Dr Clark-i December 18, 1872 nü Assam nungi Molungkimong-i atuba aser nokinketer 60-i pa meinba indang osang metetdaktsü.
Aini aoertem dang Naga nunger lushi mezüngbuba Baptiba tzübo aser December 22, 1872 nü Dr Clark-i Naga nunger nisung 15 tzüsentsüba Chungli Tzübu sayu.
November 10, 1872nü Dr Clark-i Sibasagar nung tzüsentsür nisung 9-i amshiba Baptist Chapel aser March 2 nungi October 2, 1876 tashi Dr Clark-i yimtsüng nung amungdang amshiba menden aser bathtub sayu.
Molungkimong Ground nung sentong ka agidang Minister Yitachu-i Molungkimong nunger dang Naga Christian Heritage wazüka ayutsü ayongzük.
Nübortem temeshi aini aotsü aser Tsüngrem den tali anasatepa akümtsü atema Nagaland Baptist Church Council (NBCC) Molungkimong aser Molungyimsen yimtsüngtem Naga Christian Heritage village ta züngoktsüla, ta Yitachu-isa shisem.
Myanmar Naga Baptist Convention-i yimtsüng ana ya Naga Christian pilgrim village ta jaloktsüogo, anungji NBCC-ia iba kasaji inyaktsüla, kechiyong iba mapa ya sorkaribo meinyakteter, ta paisa tayongzükba agütsü.
Sentong nung NBCC general secretary Zelhou Keyho-ia o jembidang ashiba agi, “Naga nunger tsüngda telemsa adokdaktsütsü mesüra rarabangsentsü atema Clark Nagaland-i aruba masü.”
Minister Yitachu-i mepishiba olen agizüka Keyho-i yimtsüng ana Christian Heritage Village ta ajatsü atema NBCC kübok executive secretary 22 den onük benoka lemsateptsü, ta metetdaktsü.
Commissioner & secretary for school education & SCERT F.P. Solo-i Molungyimsen aser Molungkimong nunger dang temeshi aini aoba sentong takok ngudaktsüba atema pelaba metetdaktsü.
Sentong nung Agriculture Parliamentary secretary, Dr. Benjongliba Aier aser Industries & Commerce parliamentary secretary, Amenba Yaden natia jembia liasü.