Nagaland Angh-i aou agi yangluba metsümeshidak sayatsüogo

Dimapur, July 15 (TYO) : India merüktettsü atema inyakba Swachh Bharat Abhiyan nung teyari angutsü nükjidong nung Bodbarnü Nagaland Angh, P B Acharya-i bamboo toilet sayatsüogo.
Aou agi yangluba metsümeshidak ya India nung mezüngbuba asütsü aser Nagaland Bamboo Resource Centre, 6th mile, Sovima, Dimapur nung tanü Angh-i sayatsüogo.
Iba ‘bamboo toilet’ ya Nagaland Bamboo Development Agency aser South Asia Bamboo Foundation o Building Materials Technology Promotion Council, Govt of India nungertem yaritepa yanglur.
Aou agi yangluba metsümeshidak ya jenjang dalang aser lipoküm den teputep lir aser iba mapa purapiteta inyakertem ajak nem tenüngsang agütsür, ta PB Acharya-i ashi.
Oset yangluba dang masü saka ibaji shishilembatsü aser nüngtugu süa kümdaktsütsü kanga tongtipang lir. Iba oset nüngtugu süa amshidaktsütsü atema shishilembaba lenmang shitak alitsüla. Aou agidang public aser community toilet tapu balala yanglubaji kanga dang balaka lir, ta Angh-isa ashi.
2019 nung Swachh Bharat Abhiyan tongtettsü ta Prime minister Narendra Modi-i nangzükba osang metetdaktsüogo. Iba mapa atema mezüngbuba shilem nung linük kübok jila aser yimtsüng ajak nung metsümeshidak yanglutsü tenangzükba agia tenzükogo, ta paisa metetdaktsü.
Taoba mapang Angh-i Nagaland kübok district shia nung Swachh Bharat Brand ambassador tem shimogo aser tang aou agi yangluba metsümeshidak sayaba ajanga iba iba mapatong tejakleni aotsü imlar.
Nagaland Bamboo Development Agency Advisor, Naiba Konyak-ia o jembidang ashiba agi, Nagaland nung aou ya lokti, lipoküm aser kechisarena yanglutsü atema kanga dang tongtipang lir.
Aou aser iba nungi tajangzük angubatem agitsü asoshi tang Nagaland-i mapa ka tenzükogo, ta Naiba-isa ashi.
Aou dak sendakba mapa inyakertem ajungmesotsü aser ibaji ajanga mapa angutsü aser ano nübortem asoshi sen tarulen lenmang yanglutsü atema ayongzüktsü. Aika ajangtetogo saka ano ajangtettsüsa lir aser itemji Centre aser state sorkartem teyari ajanga inyaktettsü, ta NBDA Advisor-isa metetdaktsü.
Tanü agiba sentong nung T. Imkonglemba Ao, IAS, APC & Mission Director, NBDA-i tesentepertem pela agizük, South Asia Bamboo Foundation tir Kamesh Salam-i o tatsüka jembi aser Khrienuo C Metha, secretary to Govt of Nagaland & Team Leader, NBDA-i anküp tepela o jembi.