IS kiralongrartemi Paris amak; 127 asü 200 shi yiru

Paris, Nov. 14 (Agencies): Hokolbar aonung Islamic State (IS) kiralongrartemi France yimtiba, Paris nung tesem trok bomb aser prangpong amshia amakba lendong nung tajemba agi nisung 127 asüba aser nisung 200 dak tema yiruba osang jangjaogo.
Osang ajanga ashiba agi, iba lendong atalokba sülen nisung 300 shi mozükidangi anir oa liasü aser parnok rongnung 50 bo mozüki toktsüogo aser nisung 80 bo kanga mejungi yirua lir.
Honibar nü IS-i sangdong ka ajanga, Paris amakba ya parnok mapa lir ta metetdaktsüba sülen France Tir, Francois Hollande-i, IS nem tapet telangzüba agütsütsü ta azüngashiogo.
Yasüng iba lendong atalokba sülen Hollande-i senden ka ayonga amenba sülen par linük ajungai anogo asemnü mangyimtsü sangdongogo.
“IS teloki tang lendong agütsüba ya World War II rara sülenbo France linüki lendong tesashiba ajurur,” ta Tiri ashi.
Tanü IS sangdong ka ajanga, “Adianu 8-i tapoktsü nangri agiba den assault rifles bener Crusader France anema temoatsü nung makogo. National sports stadium aser Bataclan concert hall densema tongti tesemtem amakbaji kanga shisadanga shimba tesemtem lir,” ta ashi.
Kasa sangdong ajanga, “France tayimtsütem ajanga caliphate (IS yimli) nung Muslim nunger amakba nung parnoki aibelena lir,” ta ashi.
“Nenoki bomb agi amak tashi nenok tesünep nung malitsü. Shishilembaba tesemi aotsü atema-a nenoki tsübutsü,” ta IS-isa amokmerenogo.
US-i aniba teloktepi Syria aser Iraq na nung tayimtsü nungi IS amaker aser iba teloktep nung France-a densema lir.
Iba lendong osang angashia Queen Elizabeth II-i, la kangasa aoksar ta ashi aser British Ato kilonser David Cameron-ia Britain-i yariteptsü, ta shiogo.
India Ato kilonser Modi-i, “Paris nung tatalokba ajanga kü mulungjang züreper. Item ama tatalokbatem anema longjemer raratsüla,” ta ashi.
Russia Ato kilonser Dmitry Medvedev-i, “Onoki France tejashi lemsateper. Paris lendong ajanga asenok ajak longjemer kiralongrar anema raratsü nüngdaker ta sayur,” ta ashi.