US-i aibelenba ama masütsüla:France

Washington, November 15 (Agencies): France-i kecha marendaki Islamic State (IS) den raratsü, ajisüaka US-i Al Qaeda den raradang aibelenba ama masütsüla, ta Deobarnü Washington Post ajanga sangdong.
“US-i mezüngbuba Al Qaeda den rara tenzükdang aibelener tenzükba ama masütsü France-i angateta inyaktsüla,” ta Washington Post yimo nung shia lir.
“France Tir François Hollande-i Honibarnü ashi ama, ibai rara (war) lir. Iba rara ya takoktsü rara ka lir aser kanga mebelemi melamela koktettsü. US-a tang France den dena lir, France-i parnok dang nungi aika angazüktsü lir aser ano külemi tang tatalokdak tensa nungi angazüktsü jenti lir,” ta kasa yimo nung shia lir.
Islamic State telungpuri France nung Hokolbar aonung tesem trok amakba mapang nisung 129 tepset aser nisung 300 dak tema yirutsüogo.
Tan nübur aika taküm lalutsüba atema mang ayangtsü ta France Tir, Hollande-i sangdongogo.
“Taküm tenla agüja tapoktsü alenloker apokertem aser prangpong amer temi nüburtem pelatepba tesem trok amak,” ta osangkaket nung shia lir.
Kasa osangkaket nung ashiba agi, Syira nung IS den raratsü asoshi US Tir Barack Obama-i nübu ishika kanga aritepa yokba ama masütsüla.
US Tir Obama-i yaküm IS telok ali küma samatsütsü nangzük. Aji oda süaka tang tashi nung ano tilaba ka ang inyakteta lir. Pai linük tem lungjemtsü asoshi tawa kanga süoka jembiogo, ajisüaka iba ama rara ka nung lungjemba tetetzü kecha mali. US, Europe aser tanga linüktem nung tenangzükba tanaben reprangshia inyaker aser rarar lennir ka US nung nüngdaker,” ta osangkaket nungsa shia lir.