Pakistan-i netsüng aienba menokdanger: Mongintem

Islamabad, November 15 (Agencies): Pakistan-i linük nung netsüng yongsük tali akümba nokdangba nung khen yongi tamakok nguogo aser ibaji ajanga takoksa bener arutsü, ta Deobarnü Pakistan osangkaket ka nung mongintemi shia lir.
“Pakistan linük kümtetdang netsüng million 37 liasü aser küm 68 tashi ajungdang nisung million 191 shi kümogo. 2050 tashi nungbo nisung million 300 shi akümtsü ta asadangteter,” ta The News International ajanga Adnan Adil-i ashi.
“Tesem tila aser nüngdakba oset peria maliba tesem nung netsüng yongsük yamai aienba ajanga takoksa aika nung ajurutsü,” ta pai ashi.
Tanga linüktemi netsüng yongsük kanga junga azüokteter, ajisüaka Pakistan-i iba inyakim nung kangasa tamakok nguogo, ta pai ashi.
Alima rangben nung netsüng yongsük noklang nung shilem 1.2 agi timba küma renloker, saka Pakistan kija nung shilem 1.9 agi tali renloker, ta kaketzülur, Adnan Adil-i shia lir.
Bangladesh aser India nung shilem1.2 aser Iran nung shilem 1.3 agi renloker.
“Alima rangben nung tanur asem asoba agi perir ajisüaka Pakistan nungbo 3.58 asor. Anungji ibaji ajanga tanga linüktem dang nungi yangi tanur ka agi tali asoba sayur. Rongsen jenti aliba linük, Saudi Arabia nungang süng Pakistan dang nungi tanur tajemba asor. Yimteni temulung magütsüba ajanga linük nung netsüng yongsük renlokba menokdangtet,” ta paisa ashi.
Adil-i, “Netsüng yongsük nokdangba ajanga takoksa alur ta khenyongi mashitsüla, iba mapa tu joko süiogo. Tanü asüng iba inyakyim asoshi lenmang peria lir. Azüng zülu meteta akümba ajanga kibong sentong tajungba küma benshitettsüsa tensa ka tongogo,” ta ashi.
Population Council-i bushisüngdang ka ajanga ngutetba agi, 2012 küm Pakistan nung mashisa akümer million 4.2 bo memeteti benlokbatem liasü.