Bihar election tamakok atema Shatrughan Sinha-i Modi aitsü

Nagpur, November 15 (Agencies): Bihar assembly election nung tamakok anguba atema maneni Ato kilonser Narendra Modi aitsüba dak sentakba nung BJP MP, Shatrughan Sinha-i, state nung party-i menden angubatemji Modi ajanga lir, ta ashi.
Sinha-isa, Modi-i senotsü nangzükbaji ‘election tasa’ ka dang lir, ta Bihar nüburtemi angateta liasü, ta ashi.
“Bihar nung BJP-i anguba menden ajakji Modi ajanga lir, aser iba nungji tarendaktsü kecha mali,” ta Modi aitsüba olen ka nung Sinha-i ashi.
Film actor nungi yimtenren nung ajemoksang, Sinha nem tan Bihar election nüboyim sentong nung shilem magidaktsüba atema pa jashia liasü aser pai, Modi-i kanga meranga nübo ayimba ajanga BJP-i menden 53 angu, ta ashi.
Yasüng tesü Nagpur nung osangbenertem den jembidang Sinha-i, “Party lenirtemi Bihar nung atangji osangtem Modi dang mashi. Election nüboyimba nung tangartem (state lenirtem masü) lenisüba nung nüboyimba sentong agi, ajisüaka Patna nüburtemi vote lakh aikati shimteta Parliament-i yoksang ‘Bihari Babu’ bo (pa) nüboyimba sentong nung sentok, aser ibaji vote agütürtemi süoki ia agi aser ibaji ajanga BJP-i tamakok angu,” ta ashi.
BJP lenir aser Patna Sahib nungi Lok Sabha MP, Sinha-isa, “Chief Minister Nitish Kumar anema kecha maliasü aser Nitish Kumar-Lalu Prasad Yadav-Congress Party tem longjemer secular teloktep tentetba anogo nungsa parnoki election tesadang kabo akok,” ta ashi.
Sinha-i ashiba agi, Yadav kin, Muslim nunger, Kurmis aser Congress pusmertem vote shilem 40 shi liasü.
BJP nungi nüboyim sentong lenirtemi party anema apusoba tzüsem memeteti liasü, ta paisa aitsü.
Election matongdang Ato kilonser Modi-i Bihar atema senotsü aika nangzükba dak sentakba nung Sinha-i, “Ibaji election tasa ka dang ta ajaki meteta liasü,” ta ashi.
November 20 nü Nitish Kumar chief minister menden atema tenangzükba agiba sentong nung adentsü asü (?) ta asüngdangba langzüdang BJP lenir Sinha-i, ibaji pa jaokba yimya aser pa azünga ali-mali dak dang keta lir, ta ashi.