Dr. Neikiesalie-i ‘Shining Kohima’ mapatong tenzüktsüogo

Dimapur, November 15 (TYO) : November 14, 2015 nü Old MLA lenjem, Kohima nung Forest, Environment & Climate Change Minister, Dr. Neikiesalie Kire-i ‘Shining Kohima’ mapatong tenzüktsü.
Iba sentong nung Kohima Deputy Commissioner, Rovilatuo Mor IAS liasü aser “Shining Kohima-Never Clean, Ever Clean” omen nung ajemdaker anepdang 7:00 ako nungi Kohima jila nung lokti nübodoka merükmeju mapa inyak.
Iba mapatong ya Angami Students Union (ASU)-i Kohima Municipal Council (KMC) den yaritepa ayongzük.
Mapatong tenzükba sentong nung tongti tesemdanger Dr. Niekiesalie-i Kohima nung alir ajaki iba mapa nung yariteptsü tayongzükba agütsü.
Kohima Smart City kümdaktsütsü atema nisung ajaki shilem agitsüla aser jila merükmejua ayutsü atema gari nung senzürtem ajaki ni ama dustbin bener senzütsüla, ta Dr. Niekiesalie-isa mepishia metetdaktsü.
Iba mapatong ya Swatchh Bharat Mission kübok inyaker aser iba nung nisung ajaki shilem agitsüla. Kohima City nungi Shining Kohima City kümdaktsüba mapa nung ajaki yariteptsü mepishir, ta KMC Administrator, Kovi Meyase-ia o jembidang ashi.
Brand Ambassador Swatchh Bharat Mission, Abei-ü Meru-ia ASU aser KMC den Project 72 Hours nem tenüngsang agütsü.
Sentong nung mendenji ASU President, Dievi Yano liasü, Emmanuel Baptist Church, Asstt. Pastor, Zakiebeituo Metha-i temoatsü meshia sarasadem aser Organising Committee convener, Kezhazer Angami-i ‘Shining Kohima – Never Clean, Ever Clean’onük jembi.