Assam Rifles-i NSCN(KK) züngsem 4 aibelena kahset

Dimapur, November 15 (Agencies) : Myanmar den arrtsüa aliba Tuensang district nung sepaitemi sorkar den ceasefire tenangzüktep agia aliba telok nungi züngsem pezü aibelena kahset.
S.S. Khaplang-i aniba NSCN-K telok nungi züngsem kar senzüba osang angazükba sülen Deobarnep sepaitemi item nisungtem aputsü atema bushiteptsü tenzük, ta Assam Rifles PRO-i sangdong ka nung metetdaktsü.
Tuensang district kübok Shamatore nungi kilometer ana shi pilar aliba Laikuner yimtsüng nung NSCN(K) züngsem kar lir ta osang angazükba sülen Deobar anepdang sepaitemi iba yim meketbanger telungpurtem bushitsü tenzük.
Yim telung nung sepaitemi Community Hall leni aodang idakji alirtemi injang kahloktsü. Iba jagi Assam Rifles sepaitemi meyiper kahtep tenzük aser telok ana tsüngda ghonda ana ser tesadang shi ka kahtep.
Iba mapang telungpurtemi parnok maitsü ashitsü memerang mesüra Assam Rifles matsüngdang temai adoktsü atema kecha mashi. Iba mapang sepaitemi civilian tem yiruyibong asüba tatalokba melidaktsütsü atema kanga azüok, ta AR PRO -i sangdong nung shia lir.
Kahtepba sülen iba tesem nung sepaitemi bushitepa aodang telungpur tasümang pezü angu aser AK-47 assault rifle ka, M-16 assault rifle ka aser.303 assault rifles ana den injang aika ngutet. Tasürtem maitsü metettsü atema bsuhitepdang parnokji NSCN(KK) telok nungi liasü ta bushitet.
Taoba hopta tsüngda Myanmar nungi NSCN(K) telungpurtem Mon, Tuensang, Zunheboto, Kiphire aser Phek district tem nung senzüba osang aika angazük, ta AR PRO-isa ashi.
NSCN(K) züngsemtem Nagaland-i arubaji sepaitem anema mapa inyaktsü aser iba den tashiyim agi sen sarutsü atema lir. Anosa, item tesemtem nung NSCN(IM), NSCN(KK) aser NSCN(R) züngsemtemia sen saruba osang angazükogo.
Chairman Cease Fire Monitoring Group (CFMG)/ Cease Fire Supervisory Board (CFSB) Office ajanga telungpur teloktem dang aonung mashi mesenzütsü tetuyuba agüja lir. Talisa parnok dang Tuensang, Kiphire aser Phek district amala nung prangpong-injang bener mesenzütsü atema tetuyuba agütsüogo, ta AR PRO sangdong nungsa shia lir.
Prangpong-injang bener senzüsenbongtsüsa mapang adokra telungpurtemi parnok anasatiba nung aliba Assam Rifles post commander dang iba osang metetaktsütsü atema Chairman CFMG/ CFSB office ajanga osang metetdaktsüogo.
Telungpurtemi Designated Camps adena orr prangpong-injang bener senzübaji Cease Fire Ground Rules anema inyakba mapa ka lir aser item tetuyuba agüja liaka NSCN(KK) nungi telok ka Shamatore nung sepaitem dang osang kecha meshii dang mapa inyakba jungkai adoka sayuogo. Parnoki Cease Fire Ground Rules aser Assam Rifles o Chairman CFMG/ CFSB office tetuyuba anema mapa inyak, ta AR PRO-isa ashi.
Mapang shia telungpur telok ajak den CFMG/ CFSB senden alidang Cease Fire Ground Rules alema inyakba onük benoka jembiyonga arur. Ajisüaka sepaitemi telungpur telok balala nungi züngsemtemi tashiyim agi sen saruba aser ozüngi memelai prangpong-injang bener senzüba atema apur.
Tang tesüsatiba atalokabji, November 15, 2015 nü Tizit nung NSCN(R) züngsem kar apuba lir. Item nisungtem yagi Changlang District (Arunachal Pradesh) nungi New Phuktong (Mon District)-i züngsem tasen 19 anir aotsü merangdang apu. Züngsem tasen aniokba mapaji Cease Fire Ground Rules anema lir.
Assam Rifles patrol aser NSCN(KK) tsüngda ajungben lendong ajuruba atema sasa bilemer, saka iba ya Cease Fire Ground Rules aser Chairman CFMG/ CFSB office nungi tetuyuba agütsüba ama meinyakba ajanga atalok, ta sangdong nung shia lir.
Tarutsü nung ibala tesasatsü aketba lendong mataloktsü atema telungpur telok ajaki Cease Fire Ground Rules kübok anidaktsü mepishir aser Designated Camps adener prangpong-injang amshitsüsa kümra HQ IGAR (North) mesüra anasatiba nung aliba Sector HQ/ Assam Rifles Unit nem osang sangoktsütsü metetdaktsür, ta Assam Rifles PRO-i sangdong nungsa shisem.