Bihar election ajanga Hindu nunger timbakati tesünep aginüba sayur: Dalai Lama

Jalandhar, Nov. 15 (Agencies): Tibet nunger tamangba lenir Dalai Lama-i, Bihar election osang ajanga Hindu nunger timbakati tesünep aser amalitep aginüba sayur, ta ashi.
14 buba Dalai Lama-i, “Mapang talangka nungi India nung tesünep sobaliba lir. Tawa agiba assembly election nung Bihar nungertemi, tang tashi Hindu nunger timbakati yimjung aser amalitep aginüba kuli sayuogo,” ta ashi.
“Iba amalitep ajanga India ya tamangba lokti balala tesünep nung aliba linük ta alimai meteta aküm. Yangi tamangba yimsü ajak aser nija ajak kasasa akhümtsübuteper,” ta pai Jalandhar nung osangbenertem dang ashi.
“Tamangba yimsü nung akhümtsübutep tetezü, tamangba yimsü ajak akhümtsübuba dang masü saka nisung-a akhümtsübuba lir. Buddhist yimsü-a iba linük nung tenzük aser ibaji ajanga, India ya tesayur ka aser Buddhist amanger ajakji kaketshirtem lir,” ta paisa ashi.
Dalai Lama-i jembiba oji JD(U) aser Congress napronglai pela agizüka, tali bilemloka oa inyaker teloktem nem tetemsü telangzüba ka agütsüogo, ta ashi.
JD (U) lenir, KC Tyagi-i, “Tamangba yimsü lenir Dalai Lama-i jembiba oji ni pela agizüker. Pa India nung mapang talangka liogo, anungji pai India sobaliba meteta lir. Pai jembiba o ajanga India nung tali bilemloka oa inyaker teloktem nem tetemsü telangzüba ka agütsüogo,” ta ashi.
Ano külen Congress lenir Sandeep Dikshit-ia, “Tibet nunger atema Dalai Lama ya tamangba yimsü lenir ka aser yimtenren lenir ka lir. Pai jembiba o ajanga Bihar nung yimjung-i takok nguogo ta sayur. India nung tangar dang nungibo tesünep dak sentakba o jembirtem nüngtuguba,” ta ashi.